უკრაინის ქალაქ დნიპროზე რუსეთის სარაკეტო თავდასხმას სულ მცირე, ერთი ადამიანი ემსხვერპლა, 15 კი დაშავდა. ამის შესახებ უკრაინის პრეზიდენტი, ვოლოდიმირ ზელენსკი სოციალურ ქსელში წერს.
ამასთან, ზელენსკი ავრცელებს ვიდეოს, რომელშიც დანგრეული შენობები ჩანს.
„რუსი ტერორისტები კიდევ ერთხელ ადასტურებენ ჰუმანურობისა და პატიოსნების წინააღმდეგ მებრძოლთა სტატუსს. სარაკეტო თავდასხმა პოლიკლინიკაზე ქალაქ დნიპროში. ამ დროისთვის დაღუპულია ერთი და დაშავებულია 15 ადამიანი. ადგილზე მიმდინარეობს დაშავებულთა გადარჩენისა და დაბომბვის შედეგების ლიკვიდაციის ოპერაციები“, – განაცხადა ზელენსკიმ.
ადგილობრივი ხელისუფლების ინფორმაციით, დაშავებულთა შორის ბავშვია. მათივე ცნობით, ცეცხლი ორ შენობას გაუჩნდა და, საერთო ჯამში, 500 კვადრატული მეტრის ფართობი მოიცვა. მაშველები ხანძრის ლოკალიზებას ამ დრომდე ცდილობენ.
