„რუსეთის მოხალისეთა კორპუსის“ წევრებმა, რომლებიც ბელგოროდის ოლქში შეიჭრნენ და რუსი სამხედროების წინააღმდეგ საბრძოლო მოქმედებებში ჩაერთნენ, უკრაინაში პრეს-კონფერენცია გამართეს. მათი თქმით, რუსეთის ტერიტორიაზე ახალ ოპერაციებს გეგმავენ.
„ვფიქრობ, რომ კიდევ გვიხილავთ იქითა მხარეს. მე არ შემიძლია დეტალების გაზიარება და მიმართულების გამჟღავნება. საზღვარი საკმაოდ გრძელია“, - განუცხადა ჟურნალისტებს „რუსეთის მოხალისეთა კორპუსის“ ხელმძღვანელმა დენის კაპუსტინმა.
„რუსეთის მოხალისეთა კორპუსი“ ასევე მონაწილეობდა მარტში ბრიანსკის ოლქში განხორციელებულ მსგავს ოპერაციაში.
რუსეთის თავდაცვის სამინისტრო ამტკიცებს, რომ დაჯგუფებები, რომლებიც ბელგოროდის ოლქში შეიჭრნენ, განადგურებულია, „ნაციონალისტების ნარჩენები კი უკრაინის ტერიტორიაზეა განდევნილი“. უწყების განცხადებით, შეტაკებების დროს დაიღუპა 70-ზე მეტი „დივერსანტი“.
თუმცა კაპუსტინმა განაცხადა, რომ დაიჭრა ორი ადამიანი, დაღუპულები კი არ არიან. მისი თქმით, გრაივორონის“ საკონტროლო-გამშვებ პუნქტზე ხელში ჩაიგდეს ჯავშანპტრასპორტიორი, იარაღი და სხვა ტექნიკა.
ამავე დროს ლეგიონ „რუსეთის თავისუფლების“ წარმომადგენლებმა, როლებიც პრეს-კონფერენციას ესწრებოდნენ, განაცხადეს, რომ ოპერაციაში დაიღუპა 2 ადამიანი, ხოლო 10 დაიჭრა.
ჟურნალისტებმა „რუსეთის მოხალისეთა კორპუსის“ მეთაურს კომენტარი სთხოვეს დასავლური მედიის ცნობებზე, რომ მათ ბელგოროდის ოლქში გამოიყენეს ამერიკული იარაღი.
„ზუსტად ვიცი, საიდან მივიღე იარაღი. სამწუხაროდ არა დასავლელი პარტნიორებისგან... როგორც ერთხელ თქვა ვლადიმირ პუტინმა, თანამედროვე პირობებში შესაძლებელია ნებისმიერი სახის სამხედრო ტექნიკის ყიდვა“,- განაცხადა კაპუსტინმა.
