უკრაინის პრეზიდენტის ოფისის ხელმძღვანელის მრჩეველი მიხაილო პოდოლიაკი აცხადებს, რომ უკრაინას ბელგოროდში განვითარებულ მოვლენებთან კავშირი არ აქვს. ამის შესახებ პოდოლიაკი „ტვიტერში“ წერს. „უკრაინა ინტერესით ადევნებს თვალს რუსეთის ბელგოროდის ოლქში განვითარებულ მოვლენებს და სწავლობს ვითარებას, თუმცა არ აქვს მასთან არანაირი კავშირი“, - წერს პოდოლიაკი.
„ერთადერთ მამოძრავებელი პოლიტიკური ძალა ტოტალიტარულ ქვეყანაში, ყოველთვის გარდაუვლად იქცევა პარტიზანულ მოძრაობად იარაღით ხელში“, - აღნიშნავს პოდოლიაკი.
რუსეთის ბელგოროდის ოლქის ხელისუფლება ამტკიცებს, რომ მათ ტერიტორიაზე უკრაინელი დივერსანტები იმყოფებიან და მათთან ბრძოლა მიმდინარეობს.
რუსული მედიის ცნობით, ოლქის ტერიტორიაზე ამოქმედდა საგანგებო გეგმა სახელწოდებით „ედელვეისი“.
ბელგოროდის ოლქის გუბერნატორის ვიაჩესლავ გლადკოვის განცხადებით, ოლქის ტერიტორიაზე, გრაივორონის რაიონში, ჭურვები მოხვდა 3 კერძო სახლს, რის შედეგადაც დაიწვა. მისივე თქმით, ჭურვები მოხვდა ადმინისტრაციის შენობასაც. სოფელ ზამოსტიეში კი ჭურვი მოხვდა საბავშვო ბაღს, რის შედეგადაც ისიც დაიწვა. მისივე მტკიცებით, დაშავდა ქალი, რომელსაც დახმარება ადგილზე გაეწია, ასევე გლადკოვი ამტკიცებს, რომ დაშავებულია ორი კაცი, რომლებიც კლინიკაში გადაიყვანეს.
უკრაინული მხარე კი აცხადებს, რომ ბელგოროდის ოლქში ლეგიონი „თავისუფლება რუსეთს“ და „რუსული მოხალისეთა კორპუსი“ მოქმედებს და უკრაინელების დასაცავად „უსაფრთხობის ზოლს“ ქმნის.
