აშშ-ის პრეზიდენტი ჯო ბაიდენი იაპონიის ქალაქ ჰიროსიმაში „დიდი შვიდეულის“ სამიტზე ვოლოდიმირ ზელენსკისთან შეხვედრის შემდეგ გეგმავს გამოაცხადოს უკრაინისთვის დამატებით 375 მილიონი დოლარის ღირებულების სამხედრო დახმარების ახალი პაკეტის შესახებ.
ამის შესახებ Politico ამერიკელ და უკრაინელ მაღალჩინოსნებზე დაყრდნობით იუწყება.
გამოცემის ცნობით, დახმარების ახალ პაკეტში შევა მეტი საარტილერიო ჭურვი, ჯავშანტექნიკა და ანტისატანკო იარაღი - აღჭურვილობა, რომელსაც აშშ და მოკავშირეები კიევს მანამდეც აწვდინდნენ და რომელიც უახლოეს თვეებში მოსალოდნელი მძიმე ბრძოლების დროს უკრაინისთვის ძალიან მნიშვნელოვანია.
Politico-ს ცნობით, ამის შესახებ ცნობილი გახდა მას შემდეგ, რაც აშშ-ის პრეზიდენტმა მიანიშნა, რომ მესამე ქვეყნებს ნებას დართავს უკრაინას ამერიკული F-16 ტიპის გამანადგურებლები გადასცენ. მანვე „დიდი შვიდეულის“ წევრი ქვეყნების ლიდერებს აცნობა, რომ მხარს დაუჭერს საერთაშორისო ძალისხმევას უკრაინელი პილოტების მომზადების შესახებ.
„ამ ნაბიჯების ერთობლიობა წარმოადგენს კიევის მიმართ ძლიერი მხარდაჭერის გამოვლინებას, მოსალოდნელი კონტრშეტევის წინ, რომელიც, როგორც უკრაინელები იმედოვნებენ, რუსეთს მიერ ოკუპირებული ტერიტორიების დაბრუნების შესაძლებლობას მისცემთ“, - აღნიშნავს გამოცემა.
