უკრაინის შეიარაღებული ძალები ბახმუტის მიმართულებით უპირატესობას აღწევენ და კონტრშეტევის დაწყებას ცდილობენ. გასულ დღე-ღამეში უკრაინის ძალებმა წინ კიდევ 500 მეტრით წაიწიეს.
ამის შესახებ ურაინის შეიარაღებული ძალების აღმოსავლეთ დაჯგუფების სპიკერმა სერჰი ჩერევატიმ ტელემარათონის დროს განაცხადა.
შეკითხვაზე სიმართლეა თუ არა ამერიკის ომის შემსაწავლელი ინსტიტუტის ინფორმაცია ბახმუტთან უკრაინის მიერ ინიციატივის ხლში აღების შესახებ, ჩერავატიმ უპასუხა:
„ამ მიმართულებით ძალიან რთული ვითარებაა, თუმცა კონტროლირებადი. შეიძლება ითქვას, რომ დიახ - არის გარკვეული, ელემენტი იმისა, რომ ინიციატივა ხელში ავიღოთ და ვცდილობთ კონტრშეტევას“, - განაცხადა ჩერევატიმ.
ჩერევატიმ აღნიშნა, რომ ბახმუტი რჩება მტრის პრიორიტეტულ სამიზნედ. „გასული დღე-ღამის განმავლობაში მოხდა 10 საბრძოლო შეტაკება. 477-ჯერ მტერმა დაარტყა უკრაინულ პოზიციებს, განახორციელა 9 ავიადარტყმა. 141 ოკუპანტი განადგურდა, 220 დაიჭრა, ერთი ტყვედ ჩავარდა. მტერი განაგრძობს შტურმს უშუალოდ ქალაქში. ჩვენი ქვედანაყოფები, სადაც არის შესაძლებლობა, ასევე ახორციელებს მტერზე ზეწოლას და განაგრძობს წინსვლას. კერძოდ, გასულ დღე-ღამეში სხვადასხვა მიმართულებაზე ჩვენმა დამცველებმა 500 მეტრით წინ წაიწიეს“, - განაცხადა ჩერევატიმ.
