მოლდოვასა და ამერიკის შეერთებულ შტატებს შორის საჰაერო ტრანსპორტისთვის „ღია ცის შეთანხმება“ გაფორმდა. დოკუმენტს კიშინიოვში აშშ-ისა და მოლდოვის წარმომადგენლებმა მოაწერეს ხელი.
დოკუმენტი ითვალისწინებს ფრენების შეუზღუდავ მოცულობას და სიხშირეს, მარშრუტების გახსნის უფლებებს, ჩარტერული ფრენების ლიბერალურ რეჟიმს და ღია კოდის გაზიარების შესაძლებლობას, ანუ ერთი ფრენის ერთობლივ ოპერირებას ორი კომპანიის მიერ.
„შეთანხმების გაფორმება - აშშ-სა და მოლდოვას შორის პროდუქტიული თანამშრომლობის ნათელი მაგალითია, რომელიც დაფუძნებულია საერთო ღირებულებებზე. ამ შეთანხმებას აქვს მნიშვნელოვანი ეკონომიკური, სოციალური და სტარტეგიული მნიშვნელობა, ის ხელს შეუწყობს ორმხრივი თანამშრომლობის კიდევ უფრო გაძლიერებას“, - განაცხადა მოლდოვის ინფრასტრუქტურის მინისტრმა ლილიანა დაბიჯამ.
როგორც აშშ-ის სახელმწიფო დეპარტამენტის განცხადებაში ნათქვამია, შეთანხმება გააფართოებს ორი ქვეყნის ძლიერ ეკონომიკურ და კომერციულ პარტნიორობას, ხელს შეუწყობს ინტერპერსონალური კავშირების განვითარებას და შექმნის ახალ შესაძლებლობებს ავიაკომპანიებისთვის, ტურისტული კომპანიებისა და მომხმარებლებისთვის.
