გაერთიანებული სამეფო უკრაინას შორ მანძილზე მოქმედ ასობით ახალ დრონს გაუგზავნის.
ამის შესახებ ბრიტანეთის მთავრობის ადმინისტრაციამ მას შემდეგ განაცხადა, რაც უკრაინის პრეზიდენტი ვოლოდიმირ ზელენსკი ლონდონში პრემიერ-მინისტრ რიში სუნაკთან შესახვედრად ჩავიდა.
„დღეს პრემიერ-მინისტრი დაადასტურებს დიდი ბრიტანეთის მიერ ასობით საჰაერო თავდაცვის რაკეტებისა და ახალი საავიაციო დრონების მიწოდებას, მათ შორისაა შორ დისტანციაზე იერიშისთვის ასობით ახალი უპილოტო საფრენი აპარატი, რომელთა მანძილი 200 კმ-ზე მეტია“, - ნათქვამია მთავრობის განცხადებაში, რომელსაც სააგანეტო Reuters ავრცელებს.
ამასთან განცხადებაში აღნიშნულია, რომ შეიარაღება უკრაინაში უახლოეს თვეებში ჩავა.
ვოლოდიმირ ზელენსკი დიდ ბრიტანეთში დღეს ჩავიდა.
ბოლო რამდენიმე დღის განმავლობაში ზელენსკი იმყოფებოდა საფრანგეთში, გერმანიაში, იტალიასა და ვატიკანში.
საფრანგეთის პრეზიდენტთან შეხვედრის შემდეგ ემანუელ მაკრონი კიევს ახალი შეიარაღების მიწოდებას დაჰპირდა.
„უახლოესი კვირების განმავლობაში საფრანგეთი აღჭურვის რამდენიმე ბატალიონს ათეული ერთეული ჯავშანმანქანითა და მსუბუქი ტანკით, მათ შრის AMX-10RC-ით და შეასწავლის მათ მართვას“, - ნათქვამია ორივე ქვეყნის ერთობლივ დეკლარაციაში.
