ბრიუსელში, ევროკავშირის შუამავლობით სომხეთისა და აზერბაიჯანის ლიდერებს - ნოკოლ ფაშინიანსა და ილჰამ ალიევს შორის შეხვედრა გაიმართა.
ევროპული საბჭოს პრეზიდენტის შარლ მიშელის განცხადებით, შეხვედრა ორიენტირებული იყო შედეგებზე. მხარეებმა განიხილეს დღის წესრიგის ყველა საკითხო. მიშლის თქმით, შეხვედრის შემდეგ უნდა გადაიდგას გადამწყვეტი ნაბიჯები კომპლექსური სამშვიდობო შეთანხმების მისაღწევად.
საზღვრების საკითხთან დაკავშირებით, მხარეებმა პროგრესი დადებითად შეაფასეს და საზღვრების დელიმიტაციის შესახებ მომდევნო ნაბიჯებზე ისაუბრეს. შარლ მიშელის სიტყვებით, ლიდერები შეთანხმდნენ ორმხრივ შეხვედრებზე საზღვრების საკითხთან დაკავშირებით და დაადასტურეს 1991 წლის ალმათის დეკლარაციის მხარდაჭერა.
„საზღვრების საბოლოო დელიმიტაცია შეთანხმებული იქნება მოლაპარაკების გზით“, - განაცხადა მიშელმა.
შარლ მიშელმა აღნიშნა მხარეთა პოზიციების მნიშვნელოვანი დაახლოება რეგიონში კომუნიკაციებთან დაკავშირებულ საკითხებზე. მისი სიტყვებით, უკვე შეთანხმებულია, რომ სამუშაო ჯგუფები სარკინიგზო კომუნიკაციაზე საბოლოო შეთანხმებას და ამისთვის საჭირო სამუშაოებს გარკვეულ გრაფიკს მოამზადებენ.
ასევე შეთანხმდნენ დაკავებულების მორიგ გათავისუფლებაზე „მომავალ კვირებში“, ასევე განიხილეს უგზო-უკვლოდ დაკარგული პირების ბედის გარკვევა და განაღმვის სამუშაოები.
გარდა ამისა, განიხილეს სომხების უფლებები და უსაფრთხოება არაღიარებულ მთიან ყარაბაღში.
„მოვუწოდებ აზერბაიჯანს, საერთაშორისო თანამეგობრობასთან მჭიდრო თანამშრომლობით შეიმუშაოს პოზიტიური დღის წესრიგი ამ მოსახლეობის უფლებებისა და უსაფრთხოების უზრუნველსაყოფად“, - განაცხადა ევროსაბჭოს პრეზიდენტმა.
მან აღნიშნა, რომ ევროკავშირს ამ საკითხში „ფარული“ დღის წესრიგი არ აქვს და ევროკავშირის ერთადერთი მიზანია დაეხმაროს სომხეთსა და აზერბაიჯანს ყოვლისმომცველი და სამართლიანი მშვიდობის მიღწევაში.
„ჩვენ შევთანხმდით, რომ შევხვდებით ბრიუსელში იმდენჯერ, რამდენჯერაც საჭირო იქნება. ივლისში ლიდერები კვლავ შეხვდებიან ბრიუსელში და ასევე, როგორც უკვე საჯაროდ გავრცელდა ინფორმაცია - ჩვენ მალე კვლავ შევხვდებით საფრანგეთის პრეზიდენტ მაკრონთან და გერმანიის კანცლერ შოლცთან ერთად. ევროპული პოლიტიკური გაერთიანების სამიტის ფარგლებში კიშინიოვში და მე ვაპირებ ლიდერების მოწვევას კიდევ ერთ ასეთ შეხვედრაზე ოქტომბერში გრანადაში მესამე სამიტის ფარგლებში“, - დასძინა ევროპული საბჭოს პრეზიდენტმა.
