უკრაინის უმაღლესმა რადამ მიიღო რეზოლუცია, რომელშიც რუსეთის ფედერაციის პოლიტიკური რეჟიმი რაშიზმად განსაზღვრა.
რეზოლუციას მხარი დაუჭირა 281-მა დეპუტატმა. რადა გმობს რაშიზმს, როგორც რუსეთის ფედერაციის პოლიტიკური რეჟიმის იდეოლოგიურ საფუძველსა და პრაქტიკას.
ამასთან, უკრაინის პარლამენტმა მიმართა გაეროს, ევროპარლამენტს, ევროპული საბჭოს საპარლამენტო ასამბლეას, ეუთოს, ნატო-ს, სხვა სახელმწიფოების მთავრობებსა და პარლამენტებს, მხარი დაუჭირონ რაშიზმის იდეოლოგიის, პოლიტიკისა და პრაქტიკის დაგმობას.
უკრაინის პარლამენტი მოუწოდებს საერთაშორისო საზოგადოებას, შეუერთდეს რუსეთის ამჟამინდელი პოლიტიკური რეჟიმის ტერორისტულ სახელმწიფოდ აღიარებას და ტერორისტული სახელმწიფოს ორგანოების და მისი პოლიტიკური და სამხედრო ხელმძღვანელობის ქმედებები აღიაროს დანაშაულად, ხოლო რუსეთის ფედერაციის ფართომასშტაბიანი შეიარაღებული აგრესია უკრაინის წინააღმდეგ, უკრაინელი ხალხის გენოციდად.
გარდა ამისა, რადა მოუწოდებს საერთაშორისო საზოგადოებას, მიიღოს ქმედითი ზომები რუსეთის სამხედრო-პოლიტიკური ხელმძღვანელობის დასასჯელად ომის დანაშაულების, კაცობრიობის წინააღმდეგ ჩადენილი დანაშაულისა და უკრაინისა და უკრაინელი ხალხის გენოციდისთვის.
