უკრაინის პრეზიდენტმა ვოლოდიმრი ზელენსკიმ განაცხადა, რომ უკრაინა რუსეთს ბახმუტს ვერ ჩააბარებს, იმის მიუხედავად, რომ ბევრი სამხედრო ანალიტიკოსის თქმით, ქალაქს დიდი სტრატეგიული მნიშვნელობა არ აქვს.
„ჩვენ არ შეგვიძლია უარი ვთქვათ ბახმუტზე, რადგან ეს დაეხმარება რუსეთს გააფართოვოს საომარი მოქმედებების ფრონტი და რუსულ ჯარსა და „ვაგნერს“ საშუალებას მისცემს დაიკავოს ჩვენი მიწების უფრო დიდი ნაწილი“, - განაცხადა ზელენსკიმ ტელერახ Al Arabiya-თან ინტერვიუში.
მისი თქმით, თუ რუსეთი მთლიანად დაიკავებს ბახმუტს, ის შესაძლოა პლაცდარმად იქცეს დონეცკის ოლქის ორ უდიდეს ქალაქზე - კრამატორსკსა და სლავინსკზე შეტევისთვის. უკრაინის პრეზიდენტმა აღნიშნა, რომ უკრაინის არმია კონტრშეტევისთვის ემზადება და უფრო ძლიერია, ვიდრე ერთი წლის წინ იყო. მან ასევე განაცხადა, რომ მის წარმატებაში ეჭვი არ ეპარება.
“ჩვენ ვიბრძვით, ჩვენ უფრო ძლიერები ვართ ვიდრე ერთი წლის წინ“, - განაცხადა ზელენსკიმ.
ამასთან, ზელენსკიმ აღნიშნა, რომ უკრაინის არმია ემზადება კონრეშეტევისთვის და გამოთქვა რწმენა რომ ის წარმატებული იქნება.
„ჩვენი არმია ემზადება და ყველაფერს ვაკეთებთ, რომ ის უფრო ძლიერი გავხადოთ“, - თქვა მან.
ზელენსკიმ მადლობა გადაუხადა მოკავშირეებს მხარდაჭერისთვის და აღნიშნა, რომ ისინი უკრაინის დახმარებით თავიანთ ქვეყნებსაც ეხმარებიან.
მისივე თქმით, ყველას ესმის, რომ რუსეთი არ გაჩერდება უკრაინაზე, თუმცა აღნიშნა, რომ უკრაინას შეუძლია რუსეთის შეჩერება.
