უკრაინის მხარდაჭერა ერთადერთი გზაა, სხვა შემთხვევაში რუსეთი გაიმარჯვებს, – ამის შესახებ ჩეხეთის პრეზიდენტმა, პეტრ პაველმა ნატო-ს გენერალურ მდივანთან, იენს სტოლტენბერგთან შეხვედრის შემდეგ განაცხადა.
„მოხარული ვარ, რადგან ყველას გვესმის, რომ არ არსებობს უკრაინის მხარდაჭერის გარდა, სხვა გზა. ალტერნატივა არის რუსეთის წარმატება, რაც ჩვენთვის გაცილებით მეტ პრობლემას ნიშნავს და შესაძლოა, უფრო სერიოზულსაც, ვიდრე დღეს გვაქვს“, – აღნიშნა პეტრ პაველმა.
ჩეხეთის პრეზიდენტთან შეხვედრის შემდეგ იენს სტოლტენბერგმა მადლობა გადაუხადა პაველს, როგორც ნატო-ს მხარდამჭერს.
სტოლტენბერგმა განაცხადა, რომ ალიანსის ქვეყნებმა უნდა გააგრძელონ უკრაინის მხარდაჭერა და დაუმტკიცონ რუსეთის პრეზიდენტს ვლადიმირ პუტინს, რომ ის ცდება, როდესაც იმედოვნებს, რომ გატეხს უკრაინის წინააღმდეგობას ხანგრძლივი ომის დახმარებით.
„აშკარაა, რომ გვჭირდება მეტი ინვესტიცია თავდაცვაში, რადგან ჩვენ ვცხოვრობთ საშიშ სამყაროში და ვხედავთ, რომ პრეზიდენტი პუტინი მზად არის გამოიყენოს ძალა თავისი მეზობლების წინააღმდეგ“, - აღნიშნა სტოლტენბერგმა.
ჩეხეთი გეგმავს უკრაინისთვის დაახლოებით 29 მილიონი დოლარის ღირებულების სამხედრო დახმარების გამოყოფას.
