უკრაინის თავდაცვის ძალებმა ოკუპანტებს პრობლემები შეიქმნეს ფრონტის ოთხ მიმართულებაზე, სადაც მტერი ცდილობდა შეტევითი მოქმედებების განხორციელებას. უკრაინელმა სამხედროებმა საერთო ჯამში რუსეთის ძალების 40 შეტევა მოიგერიეს.
ამის შესახებ ნათქვამია უკრაინის შეიარაღებული ძალების გენშტაბის ინფორმაციაში. გენშტაბის თანახმად, მტერი ისევ ცდილობს შეტევას ლიმანის, ბახმუტის, ავდიივკისა და მარინკის მიმართულებებით.
„საომარი მოქმედებების ეპიცენტრად რჩება ბახმუტი და მარინკა. დღის განმავლობაში ფრონტის აღნიშნულ მონაკვეთებზე ჩვენმა დამცველებმა მტრის 40 შეტევა მოიგერიეს“, - ნათქვამია გენშტაბის ანგარიშში.
როგორც გენშტაბში ამბობენ, დღის განმავლობაში მტერმა ცეცხლი გაუხსნა სუმის ოლქის ხუთ და ხარკოვის ოლქის ოთხ დასახლებულ პუნქტს.
დღეს, რუსმა ოკუპანტებმა დაბომბეს ხერსონიც, რასაც ორი ქალის სიცოცხლე ემსხვერპლა.
რუსული საარტილერიო ჭურვები ქალაქის ტავრიჩესკის მიკრორაიონში საგანმანათლებლო დაწესებულების მახლობლად აფეთქდა.
დაიღუპა 48 წლის ქალი და მისი 28 წლის ქალიშვილი.
ამასთან,14 აპრილს, ოკუპანტების მიერ დონეცკის ოლქის ქალაქ სლავიანსკის დაბომბვის შედეგად მსხვერპლთა რაოდენობა 11-მდე გაიზარდა.
