ამერიკის ომის შემსწავლელი ინსტიტუტის (ISW) ექსპერტების ინფორმაციით, რუსეთი რეზერვისტებისგან აყალიბებს სპეცდანიშნულების ქვედანაყოფებს „შტორმ Z“-ს, რომელიც ქალაქის ბრძოლებისთვის გამოიყენებს. საუბარია ახალ რაზმებზე, რომლებიც ჩართული იქნებიან მე-8 გაერთიანებული არმიის და პირველი არმიის კორპუსის შემადგენლობაში.
ინსტიტუტი ეყრდნობა რუსეთის არმიის დოკუმენტს, რომელიც უკრაინელმა რეზერვის ოფიცერმა მოიპოვა და 6 აპრილს გაასაჯაროვა. მასში დეტალურად არის აღწერილი აღნიშნული რაზმების პირადი შემადგენლობისა და მათი ძირითადი საქმიანობის შესახებ ინფორმაციები.
თითოეული დანაყოფი 100 სამხედროსგან შედგება.
ISW-ში აღნიშნავენ, რომ ასეთი სპეცრაზმის შექმნა რუსეთის ფედერაციის თავდაცვის სამინისტროს არმიის კორპუსის გარეთ ფაქტობრივად ანგრევს საკუთარი არმიის სამხედრო სტრუქტურას.
„შტორმ Zის დანაყოფები განკუთვნილია საბრზძოლო მოქმედებებისთვის ქალაქებსა და გეოგრაფიულად რთულ რაიონებში სტრატეგიულად მნიშვნელოვანი ობიექტების დაკავების მიზნით“, - ნათქვამია ანგარიშში.
ამასთან, უკრაინელი რეზერვის ოფიცერი აღნიშნვას, რომ ამ სპეცდანაყოფების წვრთნებისთვის წინა ხაზზე გაგზავნამდე 10-15 დღეა გამოყოფილი.
„რუსეთის სამხედრო სარდლობა, სავარაუდოდ, ცდილობს შექმნას „შტორმ Z“-ის დანაყოფები და შეუერთოს ისინი უკვე მოქმედ ელემენტებს, რათა გააძლიეროს უმნიშვნელო ტაქტიკური წარმატებები და გააფართოვოს მომდევნო შეტევითი ოპერაციები“, - აღნიშნულია ინსტიტუტის ანგარიშში.
