9 აპრილი არის მნიშვნელოვანი ჩვენი ქვეყნის მომავლისთვის, რომ ჩვენს მთელს მსოფლიოს ვანახოთ, რომ ჩვენ გვინდა ევროპული ქვეყანა. ჩვენ არ დავნებდებით, არ გავჩერდებით და ვიბრძოლებთ ბოლომდე გამარჯვებამდე, - ამის შესახებ „ერთიანი ნაციონალური მოძრაობის“ თავმჯდომარემ, ლევან ხაბეიშვილმა თელავში განაცხადა.
დღეს “ერთიანმა ნაციონალურმა მოძრაობამ“ 9 აპრილის აქციის - “ერთად ევროპაში” კამპანიის ფარგლებში, თელავში, ერეკლე მეორეს ძეგლის მიმდებარედ აქცია გამართა.
ლევან ხაბეიშვილის თქმით, ბრძოლა იქნება გამარჯვებამდე, ვიდრე ქართველი ხალხი არ გაიმარჯვებს.
„ჩემო მეგობრებო, „რუსული ოცნება“ და ბიძინა ივანიშვილი ფიქრობდა, რომ ეს ხალხი დაიღლება, ეს ხალხი შეწყვეტს ბრძოლას, დანებდება. თქვენ ნახეთ 7-8 მარტი, თქვენ ნახეთ ბიძინა ივანიშვილი, რომელსაც ქართველმა ხალხმა დააღეჭვინა „რუსული კანონი“. ჩვენ არ ვაპირებთ, რომ დავნებდეთ, ჩვენ არ ვაპირებთ, რომ ხელები ჩამოვუშვათ, ბრძოლა შევწყვიტოთ და სიმბოლურია, რომ დღეს ვართ ქალაქში, გამარჯვებულ ქალაქში, რომელმაც პირველი დასცა ბეჭებზე ბიძინა ივანიშვილი.
ჩემო კახელებო, ჩემო ძვირფასებო, თქვენ მინდა იცოდეთ კარგად, რომ თქვენთან ერთად, თქვენი მხარდაჭერით, თქვენი ბრძოლისუნარიანობით, არ დავიღლებით, არ გავჩერდებით და ვიბრძოლებთ საქართველოს გამარჯვებამდე. ჩვენი მთავარი ამოცანა რა არის? კეთილდღეობა ყველას და არა ერთეულებს. ჩვენ ყველგან შევიკრიბებით, ყველგან ერთად დავდგებით და რომ ეგონებათ, რომ დავიღალეთ, ზუსტად მაშინ გავიმარჯვებთ რუს ოლიგარქზე.
9 აპრილი არის მნიშვნელოვანი ჩვენი ქვეყნის მომავლისთვის, რომ ჩვენს მთელს მსოფლიოს ვანახოთ, რომ ჩვენ გვინდა ევროპული ქვეყანა. ჩვენ არ დავნებდებით, არ გავჩერდებით და ვიბრძოლებთ ბოლომდე გამარჯვებამდე. რუსეთი არის დამარცხებული და ამას ჩვენ ყველანი ერთად ვნახავთ, ერთად ვიზეიმებთ გამარჯვებას“.- განაცხადა ლევან ხაბეიშვილმა.
