დღეს, 11 დეკემბერს, პროფკავშირების კულტურის სასახლეში ადვოკატთა საერთო (მესამე) კრება გაიმართება. როგორც ადვოკატთა ასოციაციაში აცხადებენ, ადვოკატთა საერთო კრებაზე ასოციაციის თავმჯდომარე, ერთწლიანი მუშაობის შემდეგ, შემაჯამებელი ანგარიშით წარდგება.
დღის წესრიგით გათვალისწინებულია ადვოკატთა ასოციაციის თავმჯდომარის, ზაზა ხატიაშვილის ანგარიშის მოსმენა აღმასრულებელი საბჭოს მიერ გაწეული საქმიანობის შესახებ, საქართველოს ადვოკატთა ასოციაციის წესდებაში ცვლილებების განხილვა და დამტკიცება, აღმასრულებელი საბჭოს მიერ წარმოდგენილი ადვოკატთა ასოციაციის ახალი სიმბოლიკის დამტკიცება, ადვოკატთა დისციპლინური წარმოებისა და დისციპლინური პასუხისმგებლობის შესახებ დებულების განხილვა და დამტკიცება, ადვოკატთა უფლებების დაცვის თაობაზე წინადადებების განხილვა, ადვოკატთა ასოციაციის თავმჯდომარის მიერ შემუშავებული მიმართვის ტექსტის დამტკიცება. განიხილება ეთიკის კომისიის წევრთა მიმართ უნდობლობის გამოცხადების საკითხი და ეთიკის კომისიის ახალი წევრების არჩევა.
ადვოკატთა საერთო კრება საქართველოს ადვოკატთა ასოციაციის უმაღლესი ორგანოა, რომელიც იმართება, სულ მცირე, წელიწადში ერთხელ და ის უფლებამოსილია, თუ მას ესწრება არა ნაკლებ 800 წევრისა. კვორუმის არარსებობის შემთხვევაში 2 კვირის ვადაში მოიწვევა განმეორებითი კრება. საერთო კრება გადაწყვეტილებას იღებს დამსწრე წევრთა ხმების უმრავლესობით.
საერთო კრება წინა კვირას კვორუმის არარსებობის გამო ჩაიშალა.
