შეხვედრაზე ძირითადი აქცენტი გაკეთდა სასამართლო რეფორმასა და პოლარიზაციაზე,- ამის შესახებ ევროპის საბჭოს საპარლამენტო ასამბლეის მონიტორინგის კომიტეტის წევრებთან შეხვედრის შემდეგ განცხადება პოლიტიკური ჯგუფის ,,მოქალაქეების“ წარმომადგენელმა, ქეთი თურაზაშვილმა გააკეთა.
როგორც დეპუტატმა ჟურნალისტებთან განაცხადა, მხარეებმა 12-პუნქტიანი გეგმის შესრულების მიმდინარეობასთან დაკავშირებით ისაუბრეს.
"დღევანდელი შეხვედრა ეხებოდა 12 პუნქტიანი გეგმის შესრულებას, დაინტერესდნენ, ჩვენ რა მოლოდინი გვაქვს იმის, თუ რა ძალისხმევას ვდებთ გეგმის შესრულების საკითხში. მე ვფიქრობ, რომ აქ უკვე ყველა პოლიტიკოსის, ყველა პოლიტიკური პარტიის პასუხისმგებლობაა მაქსიმალური ჩართულობა.
ჩვენ ყველამ უნდა გავაკეთოთ ყველაფერი, გადავდოთ პარტიული ინტერესები და ვიფიქროთ იმაზე, რომ ჩვენ ქვეყანას არ აქვს სხვა მომავალი, გარდა ევროპული მომავლისა, ამიტომ, მაქსიმუმი უნდა გავაკეთოთ. ჩვენ, ,,მოქალაქეები“ მიუხედავად იმისა, რომ ორი მანდატი გვაქვს პარლამენტში, 9 ჯგუფიდან 6 ჯგუფში აქტიურად ვიყავით ჩართულები და ვფიქრობ, სხვა პოლიტიკური პარტიების მხრიდანაც მაქსიმუმი უნდა გაკეთდეს, რათა შესრულდეს 12 პუნქტიანი გეგმა. შეხვედრაზე არ ყოფილა სხვა თემა, გარდა 12 პუნქტიანი გეგმისა. აქ იყო აქცენტი გაკეთებული სასამართლო რეფორმასთან დაკავშირებით და ძალიან დიდი აქცენტი გაკეთდა პოლარიზაციასთან დაკავშირებით, თუ რომელი პარტია რას აპირებს იმისთვის, რომ პოლარიზაცია დაძლეული იქნას. ჩვენი პოზიცია არის, რომ ჩვენ მზად ვართ ვითანამშრომლოთ აბსოლუტურად ყველა პოლიტიკურ ძალასთან იმისთვის, რომ მაქსიმუმი გაკეთდეს 12 პუნქტის შესასრულებლად“ _ განაცხადა ქეთი თურაზაშვილმა.