საქართველოში ფასადამოფარებული დემოკრატიაა - განაცხადა "სახალხო კრების" აღმასრულებელმა წევრმა ნინო ბურჯანაძემ საქართველოში აკრედიტირებულ დიპლომატიურ კორპუსთან შეხვედრის დასრულების შემდეგ.
მისი თქმით, აღმასრულებელი საბჭოსა და საქართველოში არსებული დიპლომატიური კორპუსის შეხვედრაზე, აღნიშნულ თემასთან ერთად, სახალხო კრების გეგმებიც განიხილეს.
"დიპლომატიურ კორპუსს დეტალურად მოვუყევით თუ რამ განაპირობა სახალხო კრების შექმნა. ჩვენ განვიხილეთ ის თუ რას იზამს მომავალში სახალხო კრება. დიპლომატებისგან დიდი დაინტერესება ჰპოვა კრებამ და მათგან ბევრი კითხვაც იყო წამოსული. მათთან ასევე ვისაუბრეთ, იმაზე რომ დღეს ადამიანის უფლებების დაცვის დღეა, საქართველოს ხელისუფლება კი უფლებების დასაცავად არაფერს აკეთებს. ეს განაპირობებს იმას, რომ საქართველოში დღეს ფასად ამოფარებული დემოკრატიაა ", - განაცხადა ნინო ბურჯანაძემ.
შეგახსენებთ, რომ "სახალხო წარმომადგენლობითი კრების" აღმასრულებელი საბჭოს წევრები - ნონა გაფრინდაშვილი, ნინო ბურჯანაძე და კახა შარტავა "თბილისი მარიოტში" საქართველოში აკრედიტირებულ დიპლომატიური კორპუსის წარმომადგენლებს შეხვდნენ.
