საქართველოს პარლამენტის თავმჯდომარის, შალვა პაპუაშვილის განცხადებით, „ლელოს“ „ნაციონალურ მოძრაობასა“ და სტრატეგია აღმაშენებელს“ ევროკავშირის რეკომენდაციების შესასრულებლად არაფერი გაუკეთებიათ და ახლა 12 პუნქტთან დაკავშირებით აქციას ნიშნავენ. პაპუაშვილის კომენტარს პირველი არხი ავრცელებს.
„გუშინ აქ მარკერებით რომ დადიოდა ზოგიერთი დეპუტატი, თითი თითზე არ დუდიათ, რათა რომელიმე რეკომენდაცია შესრულებულიყო. ყველას შევახსენებ, რომ „ლელო“ „ნაციონალური მოძრაობა“, სტრატეგია აღმაშენებელი“ არცერთ ცვლილებას არ უჭერდნენ მხარს, საერთოდ, სამუშაო ჯგუფებში არ მონაწილეობდნენ, არ მონაწილეობდნენ კომიტეტის სხდომებში, კენჭისყრებში. ყველაფერს აფუჭებდნენ, თუ რამე შეეძლოთ, რომ გაეფუჭებინათ. დადიოდნენ, ატალახებდნენ სხვადასხვა ოფისს, რომ საქართველოსთვის კანდიდატის სტატუსი არ მიეცათ, ახლა გამოცოცხლდნენ და მიტინგს თუ აქციას ნიშნავენ 12 პუნქტთან დაკავშირებით. ეს ალბათ, გარკვეულწილად, ცინიზმია. ის ხალხი, ვინც ყველაფერი გააკეთა, რომ თავს დროზე, ივნისში დამსახურებული კანდიდატის სტატუსი არ მიგვეღო – და იცით, რომ ევროკომისიის იანვრის შეფასებამ, რომელმაც სამივე ქვეყნის საბოლოო შეფასება გამოაქვეყნა, დაადასტურა, რომ საქართველო იმსახურებდა კანდიდატის სტატუსს და რომ უსამართლოდ არ მიენიჭა საქართველოს კანდიდატუის სტატუსი – ამ ხალხმა ყველაფერი გააკეთა ამისთვის მაშინ და რეკომენდაციების გადმოცემის შემდეგაც ყველაფერს აკეთებს, რათა ჩაიშალოს პუნქტების შესრულება. მიუხედავად ამისა, ნახეთ, რომ საქართველოს პარლამენტი რეკომენდაციების შესრულების საქმეში თითქმის ბოლოშია გასული. ჩვენ მომავალ კვირას მივიღებთ ადამიანის უფლებათა სტრატეგიას და ქალთა ეკონომიკური გაძლიერების კონცეფციას. ამით მე-8 და მე-9 საკითხები დიდწილად უკვე შესრულდება. დარჩება ორი ძირითადი საკითხი – სასამართლო რეფორმის და დეოლიგაქრიზაციის. ჩვენ ახლა უკვე ვენეციის კომისიის რეკომენდაციებზე დაყრდნობით, ასევე, ეუთო/ოდირის რეკომენდაციებზე დაყრდნობით, რომელიც მომავალ კვირას გვექნება, ამ საკითხსაც ბოლომდე მივიყვანთ“, – განაცხადა შალვა პაპუაშვილმა.
