სტუდენტებო, მოგიწოდებთ, ბოიკოტი გამოუცხადოთ რუსული საოკუპაციო რეჟიმის მსახურ ლექტორებს, არ შეხვიდეთ მათ ლექციაზე, ამით ყველაზე კარგ პასუხს გასცემთ საოკუპაციო რეჟიმს, – ამის შესახებ ოპოზიციონერმა დეპუტატმა, სალომე სამადაშვილმა განაცხადა.
მინდა, მივმართო ქართველ ხალხს, რომელიც არის პარლამენტთან და რომელიც შეიძლება, ჯერ არ მოსულა აქციაზე. ძვირფასო თანამოქალაქეებო, თქვენ ხართ ჩვენი თანამოქალაქეები და ჩვენ თქვენთან ერთად ვართ უმრავლესობაში ამ ქვეყანაში. ტრაგედია არის ის, რომ ჩვენ, ვისაც გვსურს ამ ქვეყნის ევროპული მომავალი, ვართ უმრავლესობა საქართველოში, მაგრამ ვართ უმცირესობაში საქართველოს წარმომადგენლობით ორგანოში, ეს რეალობა შეიცვლება. ამიტომ დღეს ჩვენ რაც უნდა გამოვაცხადოთ, ეს არის ერთიანი წინააღმდეგობის მოძრაობა ქართველი ხალხის, საზოგადოების, მოქალაქეების რუსეთის საოკუპაციო რეჟიმის წინააღმდეგ. მე ძალიან მიხარია, რომ სულ უფრო მეტი სტუდენტი უერთდება პროტესტს, მიხარია, რომ შემოუერთდნენ პროტესტს თბილისის სახელმწიფო უნივერსიტეტის იურიდიული ფაკულტეტის სტუდენტები. სტუდენტებო, მოგიწოდებთ, ბოიკოტი გამოუცხადოთ რუსული საოკუპაციო რეჟიმის მსახურ ლექტორებს, არ შეხვიდეთ მათ ლექციაზე. ამით ყველაზე კარგ პასუხს გასცემთ საოკუპაციო რეჟიმს“, – განაცხადა სამადაშვილმა.
