რუსეთის სახელმწიფო სათათბირომ მოახდინა ურთიერთგაგების მემორანდუმის რატიფიცირება, რომელიც შავი ზღვის ირგვლივ საავტომობილო გზის მშენებლობას ითვალისწინებს. ძირითადი მარშრუტი გაივლის საქართველოს, სომხეთის, აზერბაიჯანის, თურქთის, რუსეთის, უკრაინის, მოლდოვის, რუმინეთის, ბულგართის, სერბეთის, ალბანეთისა და საბერძნეთის ტერიტორიებზე.
საავტომობილო გზის მშენებლობის შესახებ მემორანდუმი 2007 წლის 19 აპრილს ბელგრადში გაფორმდა და ძალაში 2008 წლის 1-ელ ნოემბერს შევიდა. დოკუმენტი მიმართულია შავი ზღვის ეკონმიკური თანამშრომლობის წევრი სახელმწიფოების ურთიერთქმედების გაუმჯობესებისკენ, საერთაშორისო საავტომობილო გადაზიდვების ხელშეწყობისკენ. ის ასევე გულისხმობს შავი ზღვის ირგვლივ საავტომობილო გზების მშენებლობასა და რეკონსტრუქციას.
გზის სიგრძე 7 ათასი კმ. იქნება. პროექტში მონაწილე ქვეყნები მზად არიან, ერთმანეთს აღმოუჩინონ დახმარება პროექტირებაში, ტექნიკურ მომსახურებასა და ავტომაგისტრალის ექსპლუატაციაში.
მემორანდუმი ძალაში შესვლიდან 10 წლის განმავლობაში იმოქმედებს და ავტომატურად გაგრძელდება 5 წლის განმავლობაში, თუკი მასში მონაწილე წევრი სახელმწიფოების 2/3 არ გამოვა მემორანდუმის მოქმედების წინააღმდეგ.
