27 თებერვალს ბრიტანეთის პრემიერმინისტრი, რიში სუნაკი ევროკომისიის პრეზიდენტს, ურსულა ფონ დერ ლაიენს შეხვდა.
ურსულა ფონ დერ ლაიენისა და რიში სუნაკის განცხადებით, დიდმა ბრიტანეთმა და ევროკავშირმა ჩრდილოეთ ირლანდიის სავაჭრო ზომებთან დაკავშირებით შეთანხმებას მიაღწიეს.
„დღევანდელი შეთანხმება უზრუნველყოფს შეუფერხებელ ვაჭრობას გაერთიანებული სამეფოს მთელს ტერიტორიაზე, იცავს ჩრდილოეთ ირლანდიის ადგილს ჩვენს კავშირში და იცავს ჩრდილოეთ ირლანდიის მოსახლეობის სუვერენიტეტს“, – განაცხადა რიში სუნაკმა.
სუნაკის განმარტებით, შეთანხმება გააუქმებს ირლანდიის ზღვაში, ანუ ჩრდილოეთ ირლანდიასა და გაერთიანებულ სამეფოს დანარჩენ ნაწილს შორის ყველა სახის საზღვარს. გაერთიანებული სამეფოს სხვა ნაწილიდან ჩრდილოეთ ირლანდიაში საქონლის გადაადგილება მოხდება „მწვანე“ და „წითელი“ ხაზების სისტემით: „მწვანე ხაზზე“ საბაჟო პროცედურების გარეშე მოხდება იმ ტვირთის ტრანსპორტირება, რომელიც არ იქნება განკუთვნილი ევროკავშირის ბაზრისთვის. „წითელი ხაზით“ ტრანსპორტირებული ტვირთი საბაჟო შემოწმებას დაექვემდებარება.
