ბელარუსში, „მაჩულიშის“ აეროდრომში, რომელიც მინსკიდან 12 კმ-ში მდებარეობს, ორი აფეთქება მოხდა. ინციდენტის მიზეზები უცნობია.
ინფორმაციას უკრაინული მედია პორტალ BYPOL-ზე დაყრდნობით ავრცელებს. გავრცელებული ინფორმაციით, ორი აფეთქების შედეგად დაზიანდა რუსული სამხედრო-სატრანსპორტო თვითმფრინავი და თოვლის საწმენდი ტექნიკა. თუ რომელი მოდელის იყო რუსული თვითმფრინავი, უცნობია.
აფეთქებების შესახებ ოფიციალური კომენტარები ბელარუსის მთავრობის მხრიდან ჯერ არ გაკეთებულა. თუმცა ადგილობრივების თქმით, „მაჩულიშის“ აეროდრომის რაიონში შეინიშნება სამხედროებისა და სამართალდამცველების დიდი რაოდენობა. ისინი ამოწმებენ ყველა ავტომობილს, რომელიც სამხედრო ობიექტების მიმდებარედ მოძრაობს.
რუსეთი "მაჩულიშის" აეროდრომს აქტიურად იყენებს უკრაინის წინააღმდეგ ომში. აეროდრომში განლაგებულია ოკუპანტების მიგ-31К ტიპის საბრძოლო თვითმფრინავები. ამ თვითმფრინავებს შეუძლია ჰიპერბგერითი რაკეტების, „კინჟალის“ გადატანა და გაშვება.
უკრაინა არ ფლობს საჰაერო თავდაცვის იმ სისტემებს, რომლებიც აღნიშნული რაკეტების ჩამოგდებას შეძლებენ. ამიტომაც მიგ-31К ტიპის თვითმფრინავების აფრენისას უკრაინის მთელ ტერიტორიაზე საჰაერო განგაში ცხადდება. ბოლო ორი კვირის განმავლობაში ამ ტიპის თვითმფრინავების გამოჩენის გამო უკრაინაში საჰაერო განგაში სამჯერ გამოცხადდა.
