აშშ-ის ცენტრალური სადაზვერვო სააგენტოს დირექტორი უილიამ ბერნსი ადასტურებს, რომ ჩინეთის ხელისუფლება უკრაინის წინააღმდეგ ომში რუსეთისთვის ლეტალური იარაღის გადაცემის საკითხს განიხილავს, თუმცა საბოლოო გადაწყვეტილება ჯერ მიღებული არ არის. ამის შესახებ ბერნსმა CBS News-თან ინტერვიუში განაცხადა.
„დარწმუნებულები ვართ, რომ ჩინეთის ხელისუფლება განიხილავს {რუსეთისთვის} ლეტალური იარაღის გადაცემას“, - განაცხადა ბერნსმა.
მისი თქმით, ჩინეთს ჯერ კიდევ არ მიუღია გადაწტყვეტილება და აღნიშნა რომ ჯო ბაიდენის ადმინისტრაცია ცდილობს ხელი შეუშალოს ჩინეთის ხელისუფლებას, ასეთი გადაწყვეტილების მიღებაში.
„ჩვენ ვერ ვხედავთ, რომ საბოლოო გადაწყვეტილება უკვე მიღებულია და ვერ ვხედავთ ლეტალური იარაღის მიწოდების ფაქტობრივ მტკიცებულებებს. სწორედ ამიტომ ბლინკენმა და პრეზიდენტმა მკაფიოდ განმარტეს ამგვარი ნაბიჯის შედეგები“, -- განაცხადა ბერნსმა.
ბერნსი დარწმუნებულია, რომ ჩინეთის ლიდერი სი ძინპინი ძალიან ყურადღებით აკვირდება უკრაინაში რუსეთის აგრესიას.
„არ არსებობს არც ერთი უცხო ქვეყნის ლიდერი, რომელიც აკვირდება უკრაინაში პუტინის გამოცდილებას და ომის განვითარებას იმაზე უფრო ყურადღებით, ვიდრე სი ძინპინი. ვფიქრობ, ნანახის გამო მას ბევრჯერ უგრძვნია თავი უხერხულად“, - თქვა ბერნსმა.
