უკრაინის საგარეო საქმეთა მინისტრის, დმიტრო კულებას თქმით, უკრაინა დასავლურ საბრძოლო თვითმფრინავებს რუსეთის ტერიტორიაზე დარტყმებისთვის არ გამოიყენებს. ამის შესახებ მან Sky News-სთან ინტერვიუში განაცხადა.
„პარტნიორებისგან მიღებულ იარაღს ჩვენ ვიყენებთ, რათა დარტყმა განვახორციელოთ რუსეთის წინააღმდეგ უკრაინის ოკუპირებულ ტერიტორიებზე“, – აღნიშნა დმიტრო კულებამ.
შეკითხვაზე, შეუძლია თუ არა გარანტიის მიცემა, რომ უკრაინა დასავლურ თვითმფრინავებს და სხვა შორ მანძილზე მოქმედების იარაღს რუსეთის ტერიტორიაზე იერიშისთვის არ გამოიყენებს, კულებამ უპასუხა: „ჩვენ შეგვიძლია, გავცეთ გარანტია, რომ დასავლურ იარაღს უკრაინის ტერიტორიების გასათავისუფლებლად გამოვიყენებთ“.
