უნგრული მედიის ცნობით, ყოველწლიური შემაჯამებელი გამოსვლის შემდეგ უნგრეთის პრემიერმა, ვიქტორ ორბანმა პარტია "ფიდესის" წევრებთან შეხვედრაზე უკრაინაში მიმდინარე ომის საკითხი განიხილა. მისი თქმით, უნგრეთის დამოკიდებულება ომთან მიმართებაში უცვლელი უნდა დარჩეს.
ვიქტორ ორბანის მოსაზრებით, ამ ომში გამარჯვებული არ იქნება, რადგან უკრაინის უკან მთელი დასავლეთი დგას, რუსეთი კი ბირთვული სახელმწიფოა და მისი კუთხეში მოქცევა შეუძლებელია.
უნგრეთის პრემიერ-მინისტრმა, პარტია „ფიდესის“ წევრებთან შეხვედრაზე უნგრეთის ოპონენტები დაასახელა, მათ შორის ჯო ბაიდენი და ჯორჯ სოროსი.
ვიქტორ ორბანის თქმით, უნგრეთს ოპონენტების სამი ჯგუფი ჰყავს. ომის მომხრე საერთაშორისო ჯგუფები, რომლებიც ბაიდენის ადმინისტრაციასა და ბრიუსელის ბიუროკრატებს მოიცავს, უნგრეთის ყოფილი პრემიერ-მინისტრი, ფერენც დიურჩანი და მემარცხენე პოლიტიკური ჯფუფები, რომლებსაც ორბანის თქმით, ყიდულობენ და აკეთებინებენ მხოლოდ იმას, რასაც მათი კლიენტები მოითხოვენ, ასევე საერთაშორისო ჯგუფები, რომლებიც ომით ცდილობენ გამდიდრებას. ორბანმა ამ ჯგუფის მთავარ წარმომადგენელად ჯორჯ სოროსი დაასახელა.
