აშშ-ის სახელმწიფო მდივანმა ენტონი ბლინკენმა დაადასტურა მედიაში გავრელებული ინფორმაცია, რომ ჩინეთი განიხილავს რუსეთისთვის ლეტალური სამხედრო დახმარების შესაძლებლობას, რომელიც უკრაინაში რუსული აგრესიის მხარდასაჭერად გაიგზავნება.
ბლინკენმა ამის შესახებ ამერიკულ ტელერახ NBC-თან ინტერვიუში განაცხადა.
ბლინკენმა გაიხსენა, რომ ჩინეთი დიდი ხნის განმავლობაში რუსეთს მხარს უჭერდა არა მხოლოდ პოლიტიკურად და ეკონიმიკურად, არამედ არალეტალური აღჭურვილობის მიწოდებითაც.
„ჩვენ უკიდურესად შეშფოთებულები ვართ იმით, რომ ჩინეთი განიხილავს რუსეთისთვის ლეტალური დახმარების მიწოდებას უკრაინის წინააღმდეგ აგრესიის მხარდასაჭერად. და მე მკაფიოდ განვაცხადე, რომ ეს სერიოზულ შედეგებს გამოიწვევს, კერძოდ, ჩვენს ურთიერთობებში. ამის შესახებ ლაპარაკობდა პრეზიდენტი ბაიდენიც სი ძინპინთან რამდენიმე შეხვედრის დროს“, - აღნიშნა ბლინკენმა.
მან ასევე გააკრიტიკა პეკინის პოზიცია უკრაინაში რუსეთის სრულმასშტაბიან შეჭრასთან დაკავშირებით და აღნიშნა, რომ პეკინი ორ სკამზე დაჯდომას ცდილობს.
„საჯაროდ ის {ჩინეთი} თავს აჩვენებს, როგორც უკრაინაში მშვიდობის დამყარების მსურველი ქვეყანა. მაგრამ არასაჯაროდ, როგორც ვამბობდი, ბოლო თვეების განმავლობაში მიმდინარეობს არალეტალური დახმარების მიწოდება, რაც უშუალოდ ხელს უწყობს რუსეთის სამხედრო ძალისხმევას. ასევე არსებობს ინფორმაცია, რომელიც მალე გასაჯაროვდება. ამ ინფორმაციის თანახმად, ჩინეთი სერიოზულად განიხილავს რუსეთისთვის ლეტალური დახმარების მიწოდებას“, - განაცხადა აშშ-ის სახელმწიფო მდივანმა.
ამასთან, ბლინკენს არ დაუზუსტებია, რომელ დახმარებაზეა საუბარი და დასძინა, რომ არსებობს ლეტალური დახმარების სხვადასხვა სახეობა, რომლის გადაცემასაც ის {ჩინეთი} განიხილავს, მათ შორის იარაღის.
