აშშ-ის ვიცე-პრეზიდენტის, კამალა ჰარისის განცხადებით, აშშ-მა ოფიციალურად დაადგინა, რომ რუსეთმა უკრაინაში ომის დროს ჩაიდინა დანაშაულები კაცობრიობის წინააღმდეგ. ამის შესახებ მან მიუნხენში მიმდინარე პანელურ დისკუსიაზე ისაუბრა.
„მათი ქმედებები არის თავდასხმა ჩვენს საერთო ღირებულებებზე, თავდასხმა კაცობრიობაზე“, - განაცხადა ვიცე-პრეზიდენტმა.
ჰარისი აღნიშნავს, რომ რუსი სამხედროები პასუხისმგებელი არიან სისტემურ თავდასხმებზე მშვიდობიან მოსახლეობაზე, მკვლელობებზე, წამებაზე, გაუპატიურებასა და დეპორტაციაზე.
"ყველამ ვნახეთ მარიუპოლის თეატრის ფოტოები. დავფიქრდით ბუჩის ფოტოებზე, ცივსისხლიანად მოკლულ მოქალაქეებზე, ქუჩაში დატოვებულ ცხედრებზე, ველოსიპედით მიმავალ მოკლულ კაცზე, დავფიქრდეთ ოთხი წლის ბავშვზე, რომელიც რუსი ჯარისკაცის სექსუალური ძალადობის მსხვერპლი გახდა. ეს არის ბარბაროსული და არაადამიანური", - განაცხადა ვიცე-პრზეიდენტმა.
მისივე თქმით, რუსეთმა ჩაიდინა დანაშაულები კაცობრიობის წინააღმდეგ და მას მოუწევს პასუხისგება.
"ჩვენ შევისწავლეთ სამხილები, ჩვენ ვიცით კანონიერი სტანდარტი და ეჭვგარეშეა, რომ ეს არის კაცობრიობის წინააღმდეგ ჩადენილი დანაშაულები. ამერიკის შეერთებული შტატები ოფიციალურად ადგენს, რომ რუსეთმა ჩაიდინა დანაშაულები კაცობრიობის წინააღმდეგ. მე ვეუბნები, მათ ვინც, ჩაიდინა ეს დანაშაულები და მათ ზემდგომებს, რომლებიც პასუხისმგებელი არიან მომხდარზე, თქვენ მოგიწევთ პასუხისგება“, – განაცხადა კამალა ჰარისმა.
