ევროკომისარმა, ოლივერ ვარჰეიმ ევროპარლამენტარებს იდიოტები უწოდა. დეპუტატები მის გათავისუფლებას ითხოვენ. ამის შესახებ გამოცემა
politico იუწყება.
"კიდევ რამდენი იდიოტია იქ?" – ჩაილაპარაკა ვარჰეიმ.
ვარჰეიმ გააკეთა განცხადება, სადაც აღნიშნა, "გულწრფელად ვწუხვარ ჩემ შენიშვნებთან დაკავშირებული გაუგებრობის გამო".
ამასთან, ვარჰეის თქმით, აღნიშნული რეპლიკა კონტექსტიდან იყო ამოგლეჯილი, რადგან იმ დროს მის გვერდით მჯდომ პირთან საუბრობდა.
„ის უკავშირდებოდა პირად და მიმდინარე დიალოგს უნგრულად ჩემსა და ჩემი კაბინეტის ხელმძღვანელს შორის სრულიად სხვა საკითხზე, რომელიც კონტექსტიდან ამოგლეჯილია. მე ბოდიშს ვიხდი ამასთან დაკავშირებული ნებისმიერი შესაძლო გაუგებრობის გამო. სრულად ვცემ პატივს ევროკავშირის ყველა ინსტიტუტს, მათ შორის ევროპარლამენტს და მის საპატიო წევრებს“, – განაცხადა ვარჰეიმ.
"ვარჰეის ჰქონდა ბოდიშის მოხდის შანსი და მან ეს ხელიდან გაუშვა. არ შეიძლება, უბრალოდ უთხრას ევროპარლამენტარებს "თქვენ არასწორად გაიგეთ" და გააგრძელოს. უნდა დადგეს შედეგები". – თქვა მწვანეთა პარტიის წევრმა, დანიელ ფროინდმა.
სკანდალურ რეპლიკამდე პლენარულ სესიაზე ხორვატმა მემარჯვენე-ცენტრისტმა დეპუტატმა, ტომისლავ სოკოლმა ვარჰეის ჰკითხა, რის გაკეთებას გეგმავდა ევროკომისარი დასავლეთ ბალკანეთის ქვეყნებში სერბეთის ჩარევასთან და რუსეთთან სერბეთის მჭიდრო თანამშრომლობასთან დაკავშირებით.
