უნგრეთმა დაბლოკა ევროკავშირის ინიციატივა, გამოეთქვათ პროტესტი საქართველოს ხელისუფლების მიმართ ყოფილი პრეზიდენტის, მიხეილ სააკაშვილის საქმესთან დაკავშირებით. ამის შესახებ უკრაინული მედია, პოლონურ რადიო RMF FM-ზე დაყრდნობით იუწყება.
პოლონეთი გამოვიდა ინიციატივით, შეეჩერებინათ პატიმრობის ვადა სააკაშვილისთვის, რათა მას საზღვარგარეთ მკურნალობის შესაძლებლობა მისცემოდა. წინადადება უნდა შესულიყო ევროკავშირის დიპლომატიურ პროტესტში, რომლის გამოხატვასაც საქართველოს ხელისუფლების მიმართ აპირებდნენ.
პოლონეთის პრემიერ-მინისტრმა, მატეუშ მორავიეცკიმ ევროკავშირის სამიტზე განაცხადა, რომ პოლონეთი მზად არის მკურნალობისთვის სააკაშვილის მისაღებად. უნგრეთი ერთადერთი ქვეყანა აღმოჩნდა, რომელმაც პოლონეთის წინადადებას მხარი არ დაუჭირა.
ევროკავშირის დიპლომატები ცდილობენ, დაარწმუნონ უნგრეთის ხელისუფლება, შეცვალოს პოზიცია.
