"გირჩის“ ერთ-ერთმა ლიდერმა, ვახტანგ მეგრელიშვილმა საქართველოს პირველი არხის გადაცემაში „დღის თემა“ თამთა სანიკიძის შეკითხვაზე, რის საფუძველზე შეიძლება, ეთქვას უარი ქვეყანას კანდიდატის სტატუსზე მაშინ, როდესაც გამოქვეყნდა ევროკომისიის დადებითი ანგარიში, სადაც საქართველომ მაღალი ქულები მიიღო და „ქართული ოცნება“ რეკომენდაციების უმეტესობას შესრულებულად აცხადებს, განაცხადა, რომ შეიძლება, ქვეყანას უარი ეთქვას პოლიტიკური მოტივით.
„მე მაგალითად, ვმონაწილეობ პროცესში და იმ ოპოზიციაში არ გავდივარ, რომელმაც არ იცის 12 პუნქტი შესრულდა, თუ არ შესრულდა. ძალიან კარგად ვიცი, რომ მხოლოდ ფორმალური გაგებით, ძალიან კეთილგანწყობილი შემფასებელი დაუდასტურებს „ქართულ ოცნებას“, რომ იმ 12 პუნქტიდან რამე სერიოზულად შესრულდა. თუ მოვინდომებთ, უმარტივესად დავამტკიცებთ, რომ 12-ვე პუნქტი ერთნაირი ღირებულების არ არის და ყველაზე მნიშვნელოვან პუნქტებთან დაკავშირებით, რაც მოთხოვნილი იყო, საერთოდ არაფერი არ მომხდარა. დეპოლარიზაცია აიღეთ, კლოუნადა, რომელიც საქართველოში მიმდინარეობს, ხომ შეიძლება, ჩავთვალოთ, რომ უფრო გაძლიერებულია, ვიდრე მაშინ, როდესაც ამ 12 პუნქტზე რეკომენდაცია მოგვცეს, თუნდაც, მიხეილ სააკაშვილთან გართულებული სიტუაციის გამო? ქვეყანაში არ ხდება არანაირი დეპოლარიზაცია და არანაირი პოლიტიკური პროცესი. დღეს, სამხედრო რეფორმაზე ველაპარაკებოდით და ისევ ჯარში ძალით წაყვანა უნდათ ხალხის. მედიის ინტერესის სფეროში არც ერთი თემა არ გამოდის დაპირისპირების, კადრების გავრცელების, პერსონალური ჭორაობის გარდა და ეს ევროპელები მართლა დებილებად ხომ არ მიგვაჩნია, ან იდიოტები ხომ არ გვგონია, რომ ქართული არ იციან და სწორად ვერავინ გადაუთარგმნის, რა ხდება ამ ქვეყანაში? ეს ხომ ესმით და შესაბამისად, მოლდოვას და უკრაინას რომ სხვადასხვა ტექნიკური პარამეტრით ვუსწრებთ, მხოლოდ ამის მიხედვით ხომ ვერ მიიღებენ გადაწყვეტილებას?“, – განაცხადა ვახტანგ მეგრელიშვილმა.
