ჯანდაცვის მსოფლიო ორგანიზაციაში აცხადებენ, რომ სირიაში დამანგრეველი მიწისძვრის შედეგად დაახლოებით 8 500 ადამიანი დაიღუპა.

„რთულია ზუსტი ციფრის დასახელება, ის ყოველდღე იზრდება. თუმცა დღეისათვის ვიცით, რომ სირიის მთავრობის მიერ კონტროლირებად ტერიტორიაზე დაიღუპა დაახლოებით 4 ათასი და დაშავდა 2 500 ადამიანი, სირიის ჩრდილო-დასავლეთში კი დაიღუპა 4 500 და დაშავდა 7 500“, - განაცხადა ბრიფინგზე ჯანმო-ს რეგიონალურმა დირექტორმა საგანგებო სიტუაციების საკითხებში რიჩარდ ბრენანმა.

7,7 და 7,6 მაგნიტუდის მიწისძვრა 6 თებერვალს თურქეთის სამხრეთ-აღმოსავლეთში, ქახრამანმარაშის პროვინციაში, სირიის საზღვართან მოხდა. ბოლო მონაცემებით, თურქეთში დაღუპულია 29 605 ადამიანი.

11 თებერვალს გაეროს გენერალური მდივნის მოადგილემ ჰუმანიტარულ საკითხებში მარტინ გრიფიტსმა განაცხადა, რომ თურქეთსა და სირიაში მიწისძვრის მსხვერპლთა რაოდენობამ, შესაძლოა, 40 ათასს გადააჭარბოს.