რუსული სამთავრობო გამოცემა „კომსომოლსკაია პრავდას“ ვებგვერდზე უკრაინაში რუსეთის არმიის მიერ ჩადენილი დანაშაულების - ყირიმის უკანონო ანექსიისა და რუსი პოლიტიკოსის ალექსეი ნავალნის შესახებ ტექსტები გავრცელდა.

გამოცემის ვებგვერდზე სულ 10 მასალა გამოქვეყნდა, მათ შორის სათაურებით - „ყირიმი უკრაინაა. რუსეთი ვალდებულია დააბრუნოს ნახევარკუნძული“, „რუსეთი გახდა პუტინის რეჟიმის ოკუპაციის მსხვერპლი“, „რუსეთის ფედერაციამ ჩაიდინა დანაშაულები ბუჩაში, იზიუმსა და ჰოსტომელში“, „ნავალნის წამება - როგორ ექცევიან რუსეთის ციხეებში პოლიტპატიმრებს“.

გაზეთის ვებგვერდზე ტექსტები ახალი ამბების რედაქტორმა ვლადიმირ რომანენკომ გამოაქვეყნა, რომელიც ომის დაწყების ერთი წლისთავს მიუძღვნა. რომანენკოს თქმით, გამოცემაში გასული წლის სექტემბრიდან მუშაობდა. მობილიზაციის გამოცხადების შემდეგ მან რუსეთი დატოვა, თუმცა „კომსომოლსკაია პრავდაში“ დისტანციურად მუშაობდა.

„ჩენთვის ეს ნაბიჯი უფსკრულში ნახტომია. მე ვეძებ სამუშაოს, დანაზოგი თითქმის აღარ დამრჩა. მაგრამ ეს ჩემთვის დანაშაულის გამოსყიდვაა. უმუშევრად დარჩენა ჩემთვის პროპორციული ფასია იმისთვის, რომ ვიტყუებოდი“, - განმარტა რომანენკომ თავისი ნაბიჯი და უკრაინელ ხალხს ბოდიში მოუხადა „იმისთვის, რომ მონაწილეობდა ამ ყველფერში“.

პუბლიკაციები გამოქვეყნებიდან 10 წუთში წაიშალა.