"თავისუფალი დემოკრატების" ლიდერ ირაკლი ალასანიას მტკიცებით, ხელისუფლებამ ვეტერანებზე პასუხისმგებლობა მოიხსნა.
როგორც ალასანიამ დღეს გამართულ პრესკონფერენციაზე განაცხადა, აღნიშნულს 2011 წლის სახელმწიფო ბიუჯეტის პროექტი ადასტურებს, რომლის მიხედვითაც, მომავალი წლიდან აღარ დაფინანსდება ვეტერანთა ერთადერთი ჰოსპიტალი, რომელიც ყოველწლიურად 5-7 ათას ვეტერანს ემსახურება.
"ამისთვის ხელისუფლებამ ვერ გამონახა 800 ათასი ლარი. არსებობს მთავრობის წარმომადგენელთა ზეპირი დაპირება, რომ ვეტერანებს თავდაცვის სამინისტრო მოემსახურება, თუმცა ეს არ არის ასახული სამინისტროს ხარჯებში შესაბამისი მუხლით. სამწუხაროდ, ხელისუფლებამ 77 ათასამდე, მათ შორის, თბილისში მცხოვრებ 22 ათასამდე ვეტერანის ჯანმრთელობის დაცვაზე უარი თქვა", - განმარტა ალასანიამ.
"თავისუფალი დემოკრატების" ლიდერის შეფასებით, ცინიკურია 2011 წლის სახელმწიფო ბიუჯეტის კანონის პროექტში შრომის, ჯანმრთელობისა და სოციალური დაცვის სამინიტროს "პრიორიტეტები".
"ცინიკურია ის, რომ სახელმწიფო დაეხმარება ტერიტორიული მთლიანობისთვის ბრძოლაში მარჩენალდაკარგულებს, რომლებმაც დაკარგეს 2 ან მეტი შვილი, მაგრამ თეთრს არ გაიღებს ერთი შვილდაკარგული დედის დასახმარებლად. ხელისუფლებამ არ აღადგინა ადრე გაუაზრებლად გაუქმებული სამედიცინო და სოციალური დახმარების ისეთი მიკროპროგრამები, როგორიცაა: გადაუდებელი და გეგმიური ოპერაციები, სამკურნალო სარეაბილიტაციო ღონისძიებები, ბალნეოთერაპიული მკურნალობა. ხელისუფლებამ თავის თავზე ვერ აიღო ვეტერანების კიდურების პროტეზებით, ეტლით, სმენის აპარატებით, ყავარჯნებით უზრუნველყოფა. ვეტერანთა მონაწილეობით შესაძლებელია სპეციალიზებული საწარმოს შექმნა, სადაც დამზადდება ზემოაღნიშნული სამედიცინო ინვენტარი, თუმცა ხელისუფლებას არ უფიქრია ვეტერანთა პროფესიული მომზადებისა და გადამზადების პროგრამის შექმნაზე", - აცხადებს ის.
ალასანია იმასაც აკრიტიკებს, რომ N2011 წლის სახელმწიფო ბიუჯეტი არ ითვალისწინებს 2004 წელს, ძალოვანი სტრუქტურებიდან ერთდროულად დათხოვნილი ვეტერანების არასამართლიანი საპენსიო უზრუნველყოფის შეცვლას.
"ძალოვანი სტრუქტურების ათეულ ათასობით პენსიონერის დისკრედიტაციას ხელისუფლება "ამართლებს" არგუმენტით - "ისინი კორუმპირებულები იყვნენ."
"თავისუფალი დემოკრატები" ვთავაზობთ ხელისუფლებას: უმოკლეს ვადაში შეიმუშაოს და საზოგადოებას განსახილველად წარუდგინოს "ვეტერანთა ჯანმრთელობისა და სოციალური დაცვის სახელმწიფო პროგრამა", შეიმუშაოს 2004 წელს შინაგან საქმეთა სამინისტრო სისტემიდან ერთდროულდ დათხოვნილი ადამიანების სრულყიფილი საპენსიო უზრუნველყოფის კანონმდებლობა, ვეტერანთა და პროფესიონალ ექსპერტთა მონაწილეობით. უმოკლეს ვადაში გადაწყდეს ერაყსა და ავღანეთის სამშვიდობო სამხედრო ოპერაციებში მონაწილე საქართველოს შეიარაღებული ძალების წარმომადგენელთა სტატუსის საკითხი", - დასძინა "თავისუფალი დემოკრატების" ლიდერმა.
