9-12 დეკემბერს საქართველო თურქეთში, სტამბულში დაგეგმილ კვებისა და სასმელების საერთაშორისო გამოფენა " FOODIST 2010"-ში მიიღებს მონაწილეობას.
სოფლის მეურნეობის სამინისტროს ინფორმაციით, გამოფენის მიზანია, შექმნას ეფექტური საგამოფენო-საბაზრო პლატფორმა, რომელიც გამოფენის მსვლელობისას მწარმოებლებსა და მომხმარებელს შორის საქმიან ურთიერთობებს შეუწყობს ხელს.
გამოფენის მსვლელობისას, 4 დღის განმავლობაში, მონაწილე კომპანიებს საშუალება ექნებათ, გამართონ პრომოაქციები და ბიზნესფორუმები. ასევე დაგეგმილია სემინარები და კონსულტაციები სხვადასხვა თემაზე, პრეზენტაციები მომსახურეობის სფეროში ახალ მიმართულებებზე.
გამოფენაში მონაწილე კომპანიებს საშუალება ექნებათ, დაამყარონ კონტაქტები გამოცდილ სადისტრიბუციო, სამომხმარებლო და ვიზიტორ ჯგუფებთან, რომელთაც აქვთ შესაბამისი გამოცდილება და რესურსები კვებისა და სასმელების ინდუსტრიაში.
გამოფენაზე სხვადასხვა ქვეყნის მონაწილე კომპანიების გარდა, 180 000-მდე სტუმარს ელოდებიან.
გამოფენის ძირითადი მიმართულებებია კვების პროდუქტები და მწარმოებელ-იმპორტიორების სერვისი; ალკოჰოლური სასმელები და მწარმოებელ-იმპორტიორების სერვისი; ულკოჰოლო სასმელები და მწარმოებელ-იმპორტიორების სერვისი; სადისტრიბუციო კომპანიები; საკონსულტაციო კომპანიები; აუდიტორული კომპანიები; არასამთავრობო ორგანიზაციები.
აღნიშნულ გამოფენაში საქართველოს მონაწილეობას უზრუნველყოფს TUYAP-ის საგამოფენო კონგრესს ცენტრის პარტნიორი შპს "GRAND EXPO".
