რეინტეგრაციის საკითხებში სახელმწიფო მინისტრ ეკა ტყეშელაშვილის შეფასებით, საქართველოში ეუთოს მისიის აღდგენასთან დაკავშირებით ევროკავშირის პრეზიდენტის მიერ გაკეთებული განცხადება ადასტურებს, რომ საერთაშორისო საზოგადოებისთვის კონფლიქტების თემა დახურული არ არის.
"ევროკავშირმა კიდევ ერთხელ ნათლად მიანიშნა რუსეთს, რომ იმ ვალდებულებებს, რომელიც მას ღიად აქვს აღებული, ევროპა უყურებს, როგორც აღუსრულებელ ვალდებულებებს და არ მიიჩნევს, რომ ეს საკითხი დახურულია", - განუცხადა ტყეშელაშვილმა ჟურნალისტებს ჰერმან ვან რომპეის განცხადებაზე კომენტირებისას.
ექსტში ტყეშელაშვილის შეფასებით, ევროკავშირის პრეზიდენტის განცხადება და ორგანიზაციის მხრიდან დეოკუპაციის საკითხის კიდევ ერთხელ ფოკუსირება "ძალიან მნიშვნელოვანია", თუმცა "ამ პროცესს ასეთივე განგრძობადობა უნდა ჰქონდეს, საბოლოო ჯამში, პრაქტიკულ შედეგამდე რომ მივიდეთ".
შეგახსენებთ, რომ ევროკავშირის პრეზიდენტმა ჰერმან ვან რომპეიმ მოსკოვს საქართველოს ოკუპირებულ ტერიტორიებზე ეუთოს მისიის დაშვებისკენ კიდევ ერთხელ მოუწოდა და განმარტა, რომ გადაუჭრელი კონფლიქტები საფრთხეს უქმნიან ევროკავშირსაც და რუსეთსაც. შესაბამისი განცხადება მან გუშინ, ბრიუსელში, ევროკავშირ-რუსეთის სამიტის დასრულების შემდეგ გამართულ პრესკონფერენციაზე გააკეთა.
