კახეთის რეგიონში ცოფის საწინააღმდეგო ვაქცინის დეფიციტია. როგორც კახეთის საინფორმაციო ცენტრს ახმეტის, დედოფლისწყაროს, თელავის და ყვარლის რაიონულ საავდმყოფოებში განუცხადეს, ცოფის საწინააღმდეგო ვაქცინის მარაგი რამდენიმე დღის წინ ამოიწურა.
გურჯაანის, სიღნაღის, ლაგოდეხის და საგარეჯოს რაიონულ საავადმყოფოებში კი რამდენიმე დღის მარაგი აქვთ დარჩენილი.
კახეთის რეგიონის რვავე მუნიციპლიტეტის საავადმყოფოებს ცოფის საწინააღმდეგო ვაქცინით აფთიაქების ქსელის, შპს „იმედის" დირექტორი ომარ ალხანიშვილი ამარაგებს. როგორც კახეთის საინფორმაციო ცენტრს, ომარ ალხანიშვილმა განუცხადა, ცოფის საწინააღმდეგო ვაქცინა რეგიონში დეკემბრის დასაწყისში უნდა შემოსულიყო, მაგრამ ჯანმრთელობის და სოციალური პროგრამების სააგენტოს რეორგანიზაციის გამო, ვაქცინის შემოტანა შეფერხდა. ვაქცინის მარაგის დროზე ადრე ამოწურვა კი მასზე გაზრდილმა მოთხოვნილებამ განაპირობა.
„სოფელ ყარაჯალაში ცოფის შემთხვევის დაფიქსირების შემდეგ საგრძნობლად იმატა პაციენტების რიცხვმა და ამიტომ ვაქცინა მალე გათავდა. მაგალითად, თელავის რაიონულ სავადმყოფოში ოქტომბრის თვეში 64-მა ადამიანმა გაიკეთა ცოფის საწინააღმდეგო ვაქცინა, ნოემბერში კი 250-მა ადამიანმა. ვაქცინის შემოტანა კი ჯანმრთელობის და სოციალური პროგრამების სააგენტოში მიმდინარე რეორგანიზაციის გამო შეფერხდა. ახლა უკვე დამთავრდა რეორგანიზაციის პროცესი. ვაქციანას მალე მივიღებთ და ყველა რაიონზე გავანაწილებთ", - განაცხადა ომარ ალხანიშვილმა.
