მიუხედავად იმისა, რომ მთავრობა მეწარმეებთან ურთიერთობის ახალ ეტაპზე გადადის, რასაც შემოსავლების ახალი კურსი ითვალისწინებს, ხელისუფლება და უშუალოდ ფინანსთა სამინისტრო კრმინალთან ბრძოლას ძველი რეჟიმით გააგრძელებს.
როგორც დღეს ფინანსთა მინისტრმა კახა ბაინდურაშვილმა განაცხადა, გამარტივებული პროცედურები არ გულისხმობს იმას რომ მთავრობამ სხვადასხვა სახის კანონდარღვევაზე თვალი დახუჭოს.
"ახალი კურსი საზოგადოებრივი ინტერესის დაცვას ითვალისწინებს და ის კანონდარღვევებისა და ბოროტმოქმედების მიმართ რაიმე ტიპის შეღავათს არ ითვალისწინებს. ბოლო პერიოდში იყო საკმაოდ გახმაურებული ე.წ. აფთიაქების თემა, როდესაც შემოწმების შემდეგ რამდენიმე აფთიაქი დაილუქა, სადაც მთელი სისტემა მუშაობდა ნარკოტიკების შემოტანაზე", _ განაცხადა ფინანსთა მინისტრმა.
ბაინდურაშვილის განმარტებით, ის წამალი, რომელიც ამ აფთიაქებში იყიდებოდა იყო ნარკოტიკული და ზედმეტი დოზით მისი მიღება იწვევდა სიკვდილს.
ფინანსთა მინისტრის განმარტებით, მნიშვნელოვანი იყო ასევე ტოტალიზატორების თემაც, როდესაც შემოსავლების სამსახურმა სექტორი შეამოწმა აღმოჩნდა, რომ ორი წლის განმავლობაში ტოტალიზატორებში ადამიანებს 100 მლნ ლარით ჰქონდათYწაგებული, თუმცა ამ წაგებებიდან ტოტალიზატორებს შემოსავლების სამსახურში არცერთი თეთრი არ ჰქონდათ გადახდილი.
"კრიმინალების მიმართ ვიქნებით ისეთივე ეფექტურები და შეურიგებლები, როგორიც აქამდე ვიყავით", _ განაცხადა კახა ბაინდურაშვილმა.
