ანაკლია თავისუფალ ტურისტულ ზონად გამოცხადდა. აღნიშნულის შესახებ მთავრობის ინიციატივა ბიუროს სხდომაზე დარეგისტრირდა, რომლის დაჩქარებული წესით გახილვა მთავრობის საპარლამენტო მდივანმა გია ხუროშვილმა მოითხოვა.
"ქობულეთის მსგავსად, ანალოგიურ შეღავათებს ვაცხადებთ უკვე ანაკლიაშიც, რის შედეგადაც ერთი წლის შემდეგ ველოდებით, რომ სრულიად განახლებულ ინფრასტრუქტურას მივიღებთ, დამატებით სამუშაო ადგილებს, სასტუმრობს. საბოლოო ჯამში აქ მობილიზებული შემოსავლები მიმართული იქნება ჩვენი მოსახლეობის ოჯახების კეთილდღეობისთვის, ასევე სხვადსხვა სოციალური პროექტის დასაფინანსებლად", - აღნიშნა ხუროშვილმა.
მისი ინფორმაციით, არ არის გამორიცხული, რომ მსგავსი პროექტები წარამატებით განხორცილების შემთხვევაში საქართველოს სხვადასხვა რეგიონთან მიმართებაშიც გავრცელდეს.
შეგახსენებთ, რომ საქართველოს პრეზიდენტის, მიხეილ სააკაშვილის განცხადებით, ის ინვესტორები, რომლებიც ანაკლიაში სასტუმროებს ააშენებენ, 15 წლით მოგებისა და ქონების გადასახადისაგან გათავისუფლდებიან. ხოლო იმ ინვესტორს, რომელიც ანაკლიაში 100 ნომერზე მეტი ტედავობის სასტუმროს ააშენებს, სახელმწიფო კაზინოს ლიცენზიის მოსაკრებელისგან გაათავისუფლებს.
როგორც პრეზიდენტმა განმარტა, დაინტერესებულ ინვესტორებთან კონტრაქტები 2011 წლის იანვრის ბოლომდე გაფორმდება, ხოლო სასტუმროების მშენებლობა 18 თვეში უნდა დასრულდეს.
ქობულეთის ტურისტულ ზონაში სულ 30 სასტუმროს მშენებლობაა დაგეგმილი. სამთავრობო კომისიამ გამოავლინა 8 ინვესტორი, რომლებმაც ქობულეთში 15 სასტუმრო კომპლექსის მშენებლობა უკვე დაიწყეს. ცნობილია, რომ ქობულეთში, ე. წ. ფიჭვნარის ტერიტორიაზე, სასტუმროებს ააშენებენ თბილისის სავაჭრო-სამრეწველო პალატა და შ.პ.ს. "ცქიფო", შ.პ.ს. "ოქროს სტანდარტი", გოგი გოგიტიძე, ნუგზარ გამყრელიძე, გრიგოლ გაფრინდაშვილი, ს/ს "პლატინიუმ რეალ ისთეითი", სს "რუსადჯ" (რუსეთი მოსკოვის ოლქი ქ. პოდოლსკი) და "Eსჰო-ჩონცერნ" ჩჟშჩ (სომხეთი, ერევანი).
"ქობულეთის ტურისტულ ზონაში" მშენებლობის მსურველ კომპანიებს განაცხადების შეტანის შესაძლებლობა ისევ აქვთ, რადგანაც სამთავრობო კომისიის გადაწყვეტილებით, განაცხადების შეტანის ვადა 15 დეკემბრამდე გახანგრძლივდა.
ქობულეთში "თავისუფალი ტურისტული ზონის" განვითარების მიზნით, ე. წ. "ფიჭვნარის" ტერიტორიაზე, ზღვიდან 140 მ-ის დაშორებით, ახალი სასტუმროების მშენებლობისთვის მთავრობამ პოტენციურ ინვესტორებს განსხვავებული შეღავათები შესთავაზა.
პროექტის თანახმად, ე. წ. "ფიჭვნარის" ტერიტორიაზე, გამოყოფილია მიწის 3 ნაკვეთი (საერთო ფართით 11,3 ჰა), რომლებზედაც დაგეგმილია 30 სასტუმრო კორპუსის მშენებლობა. განსაზღვრულია სასტუმრო კორპუსების 3 ტიპი. მშენებლობის მსურველს შეუძლია არჩევანი გააკეთოს.
განსაზღვრულია სასტუმრო კორპუსების სართულიანობაც: 5, 6 ან 7 სართული (42, 52 ან 60 ნომერი).
პროექტის თანახმად, სამშენებლო მიწის ნაკვეთის განკარგვა განხორციელდება სიმბოლურ ფასად, დამტკიცებული საპროექტო-სამშენებლო დოკუმენტაცია დამკვეთს გადაეცემა უსასყიდლოდ. ტერიტორია უზრუნველყოფილი იქნება საინჟინრო-კომუნალური ქსელებით და სათანადო ინფრასტრუქტურით.