ყველაფერი, რაც აშშ-მა გააკეთა საქართველოში ბოლო 30 წლის განმავლობაში, იყო გაკეთებული ქართველი ხალხის მკაფიო არჩევანის მხარდასაჭერად, რაც არის უსაფრთხო, დემოკრატიული მომავალი. მიუკერძოებელი სასამართლოს მნიშვნელობა არის ცენტრალური საკითხი ასეთი მომავალისთვის, – ამის შესახებ საქართველოში აშშ-ის ელჩმა კელი დეგნანმა განაცხადა, რომელსაც ნიკა გვარამიას საქმესთან დაკავშირებით სააპელაციო სასამართლოს გადაწყვეტილებაზე და პარტია „ქართული ოცნების“ თავმჯდომარის, ირაკლი კობახიძის განცხადებაზე დაუსვეს კითხვა.
დეგნანის თქმით, ყველაფერი, რაც თუნდაც გამოიყურება, როგორც პოლიტიზება, პოლიტიკური დევნა, საქართველოს ევროატლანტიკურ მომავალს საფრთხის წინაშე აყენებს.
დეგნანის თქმით, აშშ-ში იცავენ და აფასებენ სასამართლოს დამოუკიდებლობას, რადგან მიუკერძოებელი სასამართლო დემოკრატიის საფუძველია და იგივე სურთ ქართველი ხალხისთვისაც. ელჩის განმარტებით, აშშ გააგრძელებს ქართველი ხალხის მხარდაჭერას ძლიერი დემოკრატიისა და ევროატლანტიკური მომავლის მისწრაფებაში.
„ყველამ იხილეთ აშშ-ის მთავრობის, ასევე ევროკავშირის და საქართველოს ბევრი სხვა ევროპელი მეგობრის განცხადება, ყველაფერი, რაც აშშ-მა გააკეთა საქართველოში ბოლო 30 წლის განმავლობაში, იყო გაკეთებული ქართველი ხალხის მკაფიო არჩევანის მხარდასაჭერად, რაც არის უსაფრთხო, აყვავებული და დემოკრატიული მომავალი. მიუკერძოებელი სასამართლოს მნიშვნელობა არის მთავარი, ცენტრალური საკითხი ასეთი მომავალისთვის. ყველაფერი, რაც თუნდაც გამოიყურება, როგორც პოლიტიზება, პოლიტიკური დევნა, საქართველოს ევროატლანტიკურ მომავალს საფრთხის წინაშე აყენებს. ეს არის დაპირება, რომელიც საქართველოს ლიდერებმა, მათ შორის მმართველმა პარტიამ მისცეს ქართველ ხალხს საპარლამენტო არჩევნების დროს, რომ მიაღწევენ მომდევნო მნიშვნელოვან ნაბიჯს, ძალიან მნიშვნელოვან ნაბიჯს, საქართველოს ამ გზაზე ევროატლანტიკური მომავალისკენ. ყველაფერი, რაც ამაში ერევა, ან საფრთხის ქვეშ აყენებს, დიდ შეშფოთებას იწვევს. აშშ-ში ჩვენ ვიცავთ და ვაფასებთ ჩვენი სასამართლოს დამოუკიდებლობას, რადგანც ვიცით, რომ მიუკერძოებელი სასამართლო არის საფუძველი ჩვენი დემოკრატიისა. სწორედ ეს აძლევს მას მედეგობას და სიმტკიცეს, რათა გაუძლოს სხვადასხვა გამოწვევას და დროის გამოცდას. ჩვენ იგივე გვსურს ქართველი ხალხისთვისაც. ქართველმა ხალხმა არაერთხელ თქვა, რომ მათ ძლიერი დემოკრატია სურთ, მათ სურთ ევროატლანტიკური მომავალი. აშშ გააგრძელებს ქართველი ხალხის მხარდაჭერას ამ მისწრაფების მიღწევაში. სწორედ ამას ვაკეთებთ 30 წელია და ამას გავაგრძელებთ. ნამდვილად გვჯერა საქართველოს წარმატების და გვსურს, ეს ქვეყანა იყოს წარმატებული, მშვიდობიანი და აყვავებული“, – განაცხადა კელი დეგნანმა.
