ფინანსთა სამინისტროს მომსახურების სააგენტო ფიზიკური და იურიდიული პირების ქონების რეალიზაციას იწყებს.
როგორც ფინანსთა სამინისტროს მომსახურების სააგენტოს ხელმძღვანელმა გრიგოლ ბაიბურთმა განაცხადა, დეკემბრის თვეში ნორმატიულ აქტებში შესული ცვლილებების შედეგად მომსახურების სააგენტოს შესაძლებლობა ეძლევა განახორციელოს, როგორც ფიზიკური, ასევე იურიდიული პირების ქონების რეალიზაცია.
"სააგენტოს შეუძლია მომსახურება გაუწიოს, როგორც სახელმწიფო, ასევე კერძო კომპანიებს, უძრავი და მოძრავი ქონების რეალიზაციის პროცესში. ჩვენთან არსებული მოქალაქეთა მომსახურების ცენტრი მოემსახურება ქონების შეძენით დაინტერესებულ პირებს, რომელთაც ჩვენი კონსულტაციების დახმარებით ადგილზევე Eეძლევათ მონაწილეობა მიიღონ ონლაინ აუქციონებში", - განაცხადა გრიგოლ ბაიბურთმა.
ბაიბურთის განმარტებით, ფინანსთა სამინისტროს მომსახურების სააგენტოს ახალ ინიციატივას უკვე გამოეხმაურნენ როგორც სახელმწიფო ასევე კერძო სტრუქტურები და მათ შესაძლებლობა ექნებათ თავიანთი უძრავი თუ მოძრავი ქონება გაასხვისონ
წწწ.ეაუცტიონ.გე -ს მეშვეობით.
სახელმწიფო და კერძო სტრუქტურებს სარეალიზაციოდ გამოცხადებული ყველა ქონების ერთ ვებ-გვერდზე განთავსების შედეგად მომხმარებელს აღარ დასჭირდება 10-15 საიტზე შესვლა და რამდენიმე ინსტანციაში მისვლა, ინფორმაციის მოსაძიებლად.
"ჩვენი საიტის მეშვეობით ყველა პირს სურვილისამებრ შეუძლია განათავსოს უძრავი თუ მოძრავი ქონების გასაყიდად. ეს არის უნივერსალური საინფორმაციო პორტალი. მომსახურება ყველასთვის ნებაყოფლობითია და ჩვენ ვთავაზობთ დაინტერესებულ პირებს მაქსიმალურად მომხმარებელზე ორიენტირებულ სერვისს", - განაცხადა ფინანსთა სამინისტროს მომსახურების სააგენტოს ხელმძღვანელმა.
გრიგოლ ბაიბურთის განმარტებით სააგენტოს მიერ გაწეული მომსახურება იქნება ფასიანი, თუმცა იგი არ აკონკრეტებს თუ რა თანხაზე იქნება საუბარი.
მისი თქმით, მომსახურეობის სააგენტოს მიერ გაწეული მომსახურეობის საფასური ინდივიდუალური იქნება.