გერმანული ფლაგმანი ავიაკომპანია Lufthansa-ს მფრინავები [7 და 8 სექტემბერს] აღარ გაიფიციებიან, რადგან როგორც ჩანს, კომპრომისს მიაღწიეს უკეთესი სამუშაო პირობებისა და ხელფასების გაზრდის თვალსაზრისით. იუწყება Deutsche Welle.
მფრინავების პროფესიული გაერთიანების განცხადებით, ავიაკომპანიის წარმომადგენლებთან მოლაპარაკებისას "შუალედური გადაწყვეტა" იქნა ნაპოვნი.
"ზომების ყოვლისმომცველი პაკეტი არსებითად შეთანხმებულია და უახლოეს დღეებში დამუშავდება", - ნათქვამია განცხადებაში, რომელშიც დამატებითი დეტალები არ არის დაკონკრეტებული.
შეთანხმების მიღწევამდე რამდენიმე საათით ადრე, პროფკავშირმა განაცხადა, რომ მფრინავები 7 და 8 სექტემებრს გაიფიცებოდნენ.
გასულ პარასკევს, 2 სექტემბერს, Lufthansa-ს მფრინავებმა უკვე მოაწყვეს ერთდღიანი გაფიცვა, რამაც გამოიწვია 800-ზე მეტი ფრენის გაუქმება გერმანიიდან. შედეგად 130 000-მდე მგზავრი დაზარალდა. Lufthansa-ს ინფორმაციით, გაფიცვის შედეგად კომპანიამ 32 მილიონი ევროს ზარალი განიცადა.
პროფკავშირი ითხოვს, ავიაკომპანიამ 5.5%-ით გაუზარდოს ხელფასი წელსვე 5 ათას კაპიტანსა და პირველ პილოტს. ამასთან, ხელფასი ავტომატურად მიაბას ინფლაციის მაჩვენებელს.
Lufthansa-მ ამ მოთხოვნებს გადაჭარბებული უწოდა და აღნიშნა, რომ მათი დაკმაყოფილების შემთხვევაში კომპანიის სახელფასო და პერსონალის ხარჯები მომდევნო ორ წელიწადში 40 პროცენტზე მეტით, ანუ 900 მილიონი ევროთ გაიზრდება, რაც, როგორც აღინიშნა, "აბსოლუტურად მიუღებელია".