გერმანული ავიაკომპანია Lufthansa-ს მფრინავები მორიგი გაფიცვისთვის ემზადებიან, სამუშაო პირობების გაუმჯობესებისა და ხელფასების გაზრდის მიზნით მოლაპარაკებებში პროგრესის არარსებობის გამო.
"მიუხედავად საპირისპიროს მტკიცებისა, Lufthansa-ს ჯერ არ მოუმართავს ჩვენთვის და არ წარუდგენია ახალი წინადადება", - ნათქვამია მფრინავთა პროფესიული გაერთიანების Vereinigung Cockpit-ის განცხადებაში, რომელსაც მაინის ფრანკფურტში უდევს ბინა.
პროფკავშირის წარმომადგენლის განცხადებით, მოლაპარაკებების მორიგი რაუნდი 6 სექტემბერს არის დაგეგმილი.
"Lufthansa-ს შეუძლია შეაჩეროს ორდღიანი გაფიცვა, რომელიც ოთხშაბათს დაიწყება, თუ ის "სერიოზულ შეთავაზებას გააკეთებს", - თქვა მან.
გასულ პარასკევს, 2 სექტემბერს, Lufthansa-ს მფრინავებმა უკვე მოაწყვეს ერთდღიანი გაფიცვა, რამაც გამოიწვია 800-ზე მეტი ფრენის გაუქმება გერმანიიდან. შედეგად 130 000-მდე მგზავრი დაზარალდა. Lufthansa-ს ინფორმაციით, გაფიცვის შედეგად კომპანიამ 32 მილიონი ევროს ზარალი განიცადა.
პროფკავშირი ითხოვს, ავიაკომპანიამ 5.5%-ით გაუზარდოს ხელფასი წელსვე 5 ათას კაპიტანსა და პირველ პილოტს. ამასთან, ხელფასი ავტომატურად მიაბას ინფლაციის მაჩვენებელს.
Lufthansa-მ ამ მოთხოვნებს გადაჭარბებული უწოდა და აღნიშნა, რომ მათი დაკმაყოფილების შემთხვევაში კომპანიის სახელფასო და პერსონალის ხარჯები მომდევნო ორ წელიწადში 40 პროცენტზე მეტით, ანუ 900 მილიონი ევროთ გაიზრდება, რაც, როგორც აღინიშნა, "აბსოლუტურად მიუღებელია".
