10 აგვისტოს ძალაში შევიდა ევროკავშირის ემბარგო რუსეთიდან ქვანახშირის იმპორტზე, რომელიც აპრილის დასაწყისში შემოღებულ იქნა უკრაინის წინააღმდეგ რუსეთის აგრესიის გამო, სანქციების მეხუთე პაკეტის ფარგლებში.
ამავდროულად, რუსეთიდან ქვანახშირის იმპორტი შეწყვიტა დიდმა ბრიტანეთმაც.
სანქციებისა და შესაბამისად ემბარგოს მოხსნის შემთხვევაშიც კი, რუსეთის ქვანახშირისთვის ევროპული ბაზარი შეიძლება ითქვას, სამუდამოდ დაიხურა. ევროპის ქვეყნების უმეტესობა აპირებს მთლიანად უარი თქვას ამ წიაღისეულის გამოყენებაზე, რომელიც ყველაზე მავნე ზეგავლენას ახდენს კლიმატზე.
დასავლური მედიის ინფორმაციით, ქვანახშირის იმპორტზე ემბარგო ვერ აიძულებს რუსეთს, შეწყვიტოს ომი უკრაინაში, თმცა რუსეთის ეკონომიკის რამდენიმე მნიშვნელოვანი სექტორისა და რუსეთის ზოგიერთი რეგიონისთვის, ევროპის უარი რუსულ ქვანახშირზე, ხელშესახებ ზიანს გამოიწვევს.
ექსპერტების აზრით, მნიშვნელოვანი ზიანი მიადგება ისეთ მსხვილ რუს დამსაქმებელს, როგორიც არის რუსეთის რკინიგზა, რომლისთვისაც ნახშირის ტრანსპორტირება შემოსავლის ერთ-ერთი მთავარი წყაროა. უფრო მეტიც, აზიური მომხმარებლებისთვის მიწოდების გაზრდით შეუძლებელი იქნება იმ დანაკარგების სრულად ანაზღაურება, რასაც ევროპული ბაზრის დახურვა გამოიწვევს - აღმოსავლეთის მიმართულებით სატრანსპორტო სიმძლავრე შეზღუდულია და რკინიგზის გამტარუნარიანობის გაზრდას ბაიკალის რეგიონსა და შორეულ აღმოსავლეთში დასჭირდება წლები და უზარმაზარი ინვესტიციები.
ამ დროისთვის, მსოფლიო ბაზარზე ქვანახშირის დეფიციტი არ არის, თუმცა ახლა, ისევე როგორც სხვა ენერგეტიკული რესურსები, ის უკიდურესად ძვირია - 1 ტონის ღირებულება 300 დოლარზე მეტია, როცა 2021 წლის დასაწყისში 60 დოლარი ღირდა.
ევროკავშირი რუსულ ქვანახშირს ჩრდილოეთ ამერიკიდან, ავსტრალიიდან, კოლუმბიიდან, სამხრეთ აფრიკიდან და ყაზახეთიდან იმპორტირებული ქვანახშირით ჩაანაცვლებს.
