მედიამაუწყებლის მფლობელებს ოფშორულ ზონაში 10%-იანი წილის დარეგისტრირებაც ეკრძალებათ. ამის შესახებ საპარლამენტო უმრავლესობისა და "ქრისტიან-დემოკრატების" დღევანდელი შეხვედრის დასრულების შემდეგ ფრაქციის წევრმა ლევან ვეფხვაძემ განაცხადა.
"საინიციატივო ჯგუფის მიერ წარმოდგენილი კანონპროექტი სამ ნაწილად დავყავით. პირველი ნაწილი ეხება ადმინისტრაციულ კოდექსს, რომელზედაც შევთანხმდით, რომ ამ ეტპაზე არ განვიხილავთ; მეორე შეეხება კანონების ნაწილს, რომელიც არჩევნებს უკავშირდება და შევთანხმდით, რომ ეს თემები გადავა საარჩევნო ჯგუფში; რაც შეეხება მაუწყებლის მფლობლებსა და ფინასურ გამჭვირვალეობას, შევთანხმდით, რომ ბნელი წერტილი ოფშორში ის 10% აღარ იქნება, ასევე შევჯერდით იმაზე, რომ მკაფიოდ განიმარტება, რა არის ოფშორი და ამით მფლობელობის გამჭვირვალეობა იქნება უზრუნველყოფილი", - განმარტა ვეფხვაძემ.
მისი თქმით, ფინასურ გამჭვირვალეობასთან დაკავშირებით ჯერ კიდევ არის პრობლემები, რომელიც უკავშირდება დამატებით ფინასურ ვალდებულებს ტელევიზიებისთვის.
"მოვიწვევთ კომუნიკაციის კომისიას, რომელსაც ჩვენც და იურიდიული კომისიაც შევხვდებით და ამის შემდეგ მივიღებთ გადაწყვეტილებას", - აღნიშნა ვეფხვაძემ.
დეპუტატის თქმით, მნიშვნელოვანი იქნება აჭარის ტელევიზიის საკითხზე შეთანხმების მიღწევაც, რადგან მისი სტატუსი ამ ეტპაზე გაურკვეველია.
"ის არის აჭარის მთავრობის საქვეუწყებო დაწესებულება და წარმოუდგენელია თანამედროვე, დემოკრატიულ სახელმწიფოში ტელევიზია სამთავრობო სტრუქტურა იყოს. შევჯერდით, რომ გაგრძელდება მუშაობა და ჩამოყლიბდება ნორმალური საზოგადოებრივი მაუწყებელი", - აღნიშნა მან.