საფრანგეთის მთავრობა ემზადება რუსული გაზის მიწოდების სრული შეწყვეტისთვის, რადგან მიიჩნევს, რომ ასეთი სცენარი ყველაზე სავარაუდოა, - აცხადებს საფრანგეთის ფინანსთა მინისტრი ბრუნო ლე მერი.
"მე ვფიქრობ, რომ რუსული გაზის მიწოდების სრული შეწყვეტა საკმაოდ რეალური სცენარია და ჩვენ უნდა მოვემზადოთ ამისთვის. სრული უპასუხისმგებლო იქნება ამ სცენარის იგნორირება", - ციტირებს Reuters-ი მინისტრის სიტყვებს.
ლე მაირმა კრემლის მიერ გაზის შეწყვეტას "ყველაზე სავარაუდო სცენარი" უწოდა.
საფრანგეთის მთავრობა მუშაობს იმ კომპანიების განსაზღვრაზე, რომელთაც გაზის მიწოდების შეფერხების შემთხვევაში, პრიორიტეტული დაცვა უნდა მიიღონ.
"თავდაცვის პირველი ხაზი" შინამეურნეობებისა და კომპანიების მიერ ენერგომოხმარების შემცირებაა, შემდეგი ეტაპი არის ახალი ინფრასტრუქტურის მშენებლობა, როგორიცაა მცურავი ტერმინალი, თხევადი ბუნებრივი აირის საზღვარგარეთიდან მიწოდებისთვის", - ამბობს მინისტრი.
Reuters-ის ცნობით, რუსული გაზი საფრანგეთის მთლიანი საჭიროების 17%-ს შეადგენს, რაც პარიზს ნაკლებად დამოკიდებულს ხდის რუსეთზე, ვიდრე სხვა ევროპულ ქვეყნებს, განსაკუთრებით გერმანიას.
Reuters-ი საფრანგეთში ერთ-ერთ სირთულედ მრავალი ატომური რეაქტორის დახურვას ასახელებს, რადგან ეს ქვეყანას არ მისცემს საშუალებას, ბუნებრივი აირის შეწყვეტის შემდეგ, საჭირო ენერგია ბირთვული ენერგიით სწრაფად ჩაანაცვლოს.
მანამდე, გერმანიის ენერგეტიკის ფედერალურმა სააგენტომ განაცხადა, რომ რუსეთიდან გაზის მიწოდების სრულად შეწყვეტად მოელიან და მოსახლეობას ენერგიის დაზოგვისკენ მოუწოდა.
"გერმანია ემზადება შესაძლო ენერგეტიკული კრიზისისთვის", - განაცხადა გერმანიის კანცლერმა ოლაფ შოლცმა. "ჩვენ მივიღეთ ბევრი გადაწყვეტილება, რომელიც დაგვეხმარება დეფიციტისთვის მზადყოფნაში. ჩვენ ვაშენებთ მილსადენებს, თხევადი ბუნებრივი აირის ტერმინალებს", - თქვა მან.
10 ივლისს, გერმანიის ბავარიის პრემიერ-მინისტრმა მარკუს სოდერმა განაცხადა, რომ თუ სასწრაფო ზომები არ მიიღება ელექტროენერგიისა და გაზის შესაძლო დეფიციტის შედეგების თავიდან ასაცილებლად, რაც გერმანიას შესაძლოა ამ ზამთარში შეექმნას, ქვეყნის ეკონომიკა "ნამდვილი ინსულტის" წინაშე აღმოჩნდება, საიდანაც, შესაძლოა, "აღარასდროს გამოჯანმრთელდეს".
11 ივლისს ცნობილი გახდა, რომ "გაზპრომმა" ევროპას "ჩრდილოეთის ნაკადით" გაზის მიწოდება შეუწყვიტა.
