ევროკავშირი ბრიუსელში ბლოკის ლიდერებს შორის ფარული მოლაპარაკებებისთვის დაცულ ობიექტს აშენებს, რომლის ღირებულება 8 მილიონი ევროა. იტყობინება გამოცემა EU Obersver-ი, რომელსაც პროექტთან დაკავშირებით ევროკავშირის მოხსენებითი ბარათი ჩაუვარდა ხელში.
EU Observer-ის ცნობით, შენობა ისე იქნება დაპროექტებული, რომ შეხვედრები მაქსიმალურად დაცული იყოს რუსეთისა და სხვა ქვეყნების ჯაშუშებისგან.
ე.წ. "ბუნკერში" 100-მდე ადამიანის განთავსება იქნება შესაძლებელი - 34-მდე ლიდერი და 34 პროტოკოლის თანამშრომელი, ასევე ტექნიკური და დამხმარე პერსონალი.
დაცული ოთახი გარე ინტერნეტთან არ იქნება დაკავშირებული, თუმცა აღჭურვავენ შიდა საკონფერენციო ტექნოლოგიით, დიდი ეკრანითა და მიკროფონებით, რომლებიც დაკავშირებული იქნება თარჯიმნების ოთახებთან.
ყველა ოთახი დაფარული იქნება ნატოს მიერ სერთიფიცირებული საიზოლაციო კარკასით, რათა აღიკვეთოს ელექტრომაგნიტური და რადიოტალღების გავრცელება.
ოთახში შესულ პირებს მოეთხოვებათ ევროკავშირში საიდუმლო ინფორმაციასთან დაშვების მეორე დონის, SECRET EU-ს წარდგენა.
ამავდროულად, წევრი ქვეყნების ლიდერებსა და ევროკავშირის ოფიციალურ პირებს, ბუნკერში შესვლამდე მოსთხოვენ, გარეთ დატოვონ ტელეფონები, ლეპტოპები, სმარტ საათები, გასაღებები და სმენის აპარატებიც კი.
ობიექტი 2024 წლისთვის ბრიუსელში, ევროკავშირის საბჭოს შენობების კომპლექსში აშენდება.
ზუსტი ადგილმდებარეობა ჯერ დადგენილი არ არის, მაგრამ ბლოკი გეგმავს მის განთავსებას რეგულარული შეხვედრების ოთახის გვერდით, რათა გაუადვილდეს ქვეყნის ლიდერებს ერთი ოთახიდან მეორეში გადასვლა.
EU Observer-ის ცნობით, რუსეთის სადაზვერვო სამსახურების გარდა, ევროპის ქვეყნებში ფარული მოსმენების სკანდალებში ასევე ჩართულები არიან ჩინეთისა და ისრაელის სამსახურები
