ირანმა განაგრძობს ურანის გამდიდრებას ფორდოს მიწისქვეშა ბირთვულ ობიექტზე უახლესი ცენტრიფუგების გამოყენებით. ამის შესახებ Reuters-ი ატომური ენერგეტიკის საერთაშორისო სააგენტოს (IAEA) ანგარიშზე დაყრდნობით იტყობინება.
IAEA-ს წევრი ქვეყნებისთვის გაგზავნილი კონფიდენციალური ანგარიშის თანახმად, სააგენტოს ინსპექტორებმა 9 ივლისს დაადასტურეს აღნიშნული ინფორმაცია.
ანგარიშში ასევე ნათქვამია, რომ ირანი განაგრძობს ურანის გამდიდრებას შეთანხმებით ნებადართულ 3,67%-ზე უფრო მაღალ დონეზე.
საერთაშორისო შეთანხმება „ერთობლივი ყოვლისმომცველი სამოქმედო გეგმა“ (JCPOA), რომელიც მიღებულია ირანის ბირთვული პროგრამის გარშემო დაძაბულობის შესამცირებლად, თეირანს ნებას რთავს გაამდიდროს ურანი არაუმეტეს 3,67%-ით, ბირთვული ენერგიის სამოქალაქო მიზნებით გამოყენებისთვის.
ბირთვული ბომბის შესაქმნელად ურანი, სულ ცოტა, 90 პროცენტით უნდა იყოს გამდიდრებული.
2015 წელს ირანმა და "ექვსეულის" ქვეყნებმა - გაეროს უშიშროების საბჭოს ხუთმა წევრმა და გერმანიამ, დადეს შეთანხმება - ერთობლივი ყოვლისმომცველი სამოქმედო გეგმა (JCPOA), რომლის თანახმად, ირანმა უნდა დაუშვას თავის ბირთვულ ობიექტებზე ატომური ენერგიის საერთაშორისო სააგენტოს ინსპექტორები სანქცების მოხსნის სანაცვლოდ.
2018 წლის მაისში აშშ-მა დატოვა შეთანხემა და ირანის საწინააღმდეგო სანქციების მოქმედება განაახლა. ერთი წლის შემდეგ ირანმა განაცხადა, რომ ეტაპობრივად ამცირებს თავის ვალდებულებებს ირანის ბირთვულ შეთანხმებასთან დაკავშირებით.
2022 წლის მაისში ატომური ენერგეტიკის საერთაშორისო სააგენტო იტყობინებოდა, რომ ირანში გამდიდრებული ურანის მარაგმა 18-ზე მეტჯერ გადააჭარბა იმ ლიმიტს, რომელიც დადგენილია 2015 წლის შეთანხმებით ირანსა და მსოფლიოს წამყვან ძალებს შორის.
