თურქეთის ხელისუფლებამ გაათავისუფლა რუსეთის დროშის ქვეშ მცურავი ხომალდი, რომელიც კიევის ცნობით, უკრაინული მარცვლეულითაა დატვირთული.
მომხდართან დაკავშირებით უკრაინის საგარეო საქმეთა სამინისტროში დაიბარეს უკრაინაში თურქეთის ელჩი.
კიევის განცხადებით, თურქეთმა დაკავებული ხომალდი 6 ივლისს გაათავისუფლა, რაც იმედგამაცრუებელია.
"უკრაინის ხელისუფლების შესაბამისი ორგანოების ოპერატიული ჩარევის შედეგად, ამ ხომალდმა ვერ შეძლო მოპარულის გადმოტვირთვა და ის დააკავეს. თურქულ მხარეს გაუგზავნეს ხომალდისა და ტვირთის დაკავების მოთხოვნა. ამავე დროს, უკრაინული მხარის მიმართვის უგულებელყოფით, 6 ივლისის საღამოს ხომალდი გაუშვეს", - ნათქვამია უკრაინის საგარეო უწყების განცხადებაში.
ამასთან, კიევი მოუწოდებს ანკარას, ჩაატაროს აღნიშნული სიტუაციის გამოძიება და უკრაინას ამომწურავი პასუხი გასცეს.
"უკრაინულმა მხარე ღრმა მწუხარებით იღებს ამ ინფორმაციას და მიმართავს თურქულ მხარეს დაჟინებული თხოვნით, ჩაატაროს აღნიშნული სიტუაციის გამოძიება და წარადგინოს ამომწურავი პასუხი უკრაინის ხელისუფლების შესაბამისი ორგანოების მოთხოვნებზე, ასევე ყველა საშუალებით აღკვეთოს მსგავსი შემთხვევები მომავალში", - ნათქვამია განცხადებაში.
2 ივლისს ცნობილი გახდა, რომ კიევმა თურქეთს სთხოვა, დააკავოს უკრაინული მარცვლეულით დატვირთული რუსული ხომალდი.
სააგენტო Reuters-ის ცნობით, რუსული დროშის ქვეშ მცურავ ხომალდ Zhibek Zholy-ს, სავარაუდოდ, უკრაინული (მოპარული) მარცვლეული გადაჰქონდა რუსეთის მიერ ოკუპირებული პორტი ბერდიანსკიდან.
3 ივლისს ცნობილი გახდა, რომ თურქეთმა კიევის თხოვნის საპასუხოდ, დააკავა რუსეთის დროშის ქვეშ მცურავი ხომალდი.
გემი Zhibek Zholy ყაზახურ კომპანია KTZ Express Shipping-ს ეკუთვნის. მათი განცხადებით, 2021 წლის ოქტომბერში მათ გემი რუსულ „გრინლაინს“ გადასცეს იმ პირობებით, რომ ხელშეკრულების მოქმედების ვადებში "გრინლაინი" სანქციების ქვეშ არ აღმოჩნდებოდა.
