დიდმა ბრიტანეთმა ფინეთისა და შვედეთის ნატო-ში გაწევრიანების პროტოკოლის ეროვნულ დონეზე რატიფიცირება მოახდინა. აღნიშნულის თაობაზე ბრიტანეთის საგარეო საქმეთა მინისტრმა ლიზ ტრასმა განაცხადა.
"მნიშვნელოვანი მომენტია რატიფიკაციის დოკუმენტზე ხელმოწერა. რუსეთის აგრესიას ერთობითა და სიმტკიცით ვხვდებით", - დაწერა ლიზ ტრასმა სოციალურ ქსელში.
ხელმოწერის შემდეგ, რატიფიკაციის დოკუმენტები გაიგზავნება აშშ-ის სახელმწიფო დეპარტამენტში.
ამავდროულად, გავრცელდა ცნობა, რომ ფინეთისა და შვედეთის ნატო-ში გაწევრიანების პროტოკოლის რატიფიცირება ისლანდიამ და ესტონეთმა მოახდინეს.
გუშინ, პროტოკოლის ეროვნულ დონეზე რატიფიცირება დანიამ და კანადამაც მოახდინეს.
შეგახსენებთ, 5 ივლისს, ბრიუსელში, ჩრდილოატლანტიკური ალიანსის შტაბ-ბინაში წევრი ქვეყნების ელჩებმა და ფინეთისა და შვედეთის საგარეო საქმეთა მინისტრებმა ნატო-ში გაწევრიანების პროტოკოლებს მოაწერეს ხელი.
პროტოკოლების ხელმოწერამ გზა გაუხსნა ამ ორი ქვეყნის უდიდეს სამხედრო ალიანსი გაწევრიანების რატიფიცირების პროცესის დაწყებას.
ფინეთისა და შვედეთის ალიანსში გაწევრიანება საბოლოოდ დასრულდება მას შემდეგ, რაც წევრი ქვეყნების პარლამენტები პროტოკოლების რატიფიცირებას მოახდენენ. ამ პროცესს შესაძლოა ექვსიდან რვა თვემდე დასჭირდეს.
29 ივნისს ნატომ ოფიციალურად მიიწვია შვედეთი და ფინეთი ალიანსში გასაწევრიანებლად.
უკრაინაში რუსეთის მიერ გაჩარებული ომის ფონზე, შვედეთმა და ფინეთმა ნატოში გაწევრიანების განაცხადები ბრიუსელში 18 მაისს წარადგინეს. თავდაპირველად, თურქეთმა განცხადებების განხილვის პროცესი დაბლოკა, თუმცა მოგვიანებით ვეტო მოხსნა.