იტალიის მთავრობის განკარგულებით, ქვეყნის ჩრდილოეთით მდებარე რეგიონებში, რეკორდული გვალვის გამო, საგანგებო მდგომარეობა გამოაცხადა. იტყობინება Associated Press-ი.
AP-ის ცნობით, საგანგებო მდგომარეობა გამოცხადდა ხუთ რეგიონში - ემილია რომანიაში, ფრიული-ვენეცია-ჯულიაში, ლომბარდიაში, პიემონტსა და ვენეტოში.
როგორც იუწყებიან, ზოგიერთ ქალაქში, კერძოდ, ვერონაში, გვალვის გამო, წყლის გამოყენების შეზღუდვაც კი შემოიღეს.
საგანგებო მდგომარეობის გამოცხადება შესაძლებლობას მისცემს მთავრობას, გამოყოს დამატებითი სახსრები ამ რეგიონებისთვის, რომელთაც გვალვის გამო, სასოფლო-სამეურნეო კრიზისი ემუქრებათ.
ამავდროულად, იუწყებიან, რომ გვალვა შესაძლოა გავრცელდეს იტალიის ცენტრალურ და სამხრეთ ტერიტორიებზეც.
ივნისის ბოლოს, აგროკულტურული სექტორის ასოციაცია გამოვიდა გაფრთხილებით, რომ მოსალოდნელი იყო ბოლო 70 წლის განმავლობაში ყველაზე ხანგრძლივი და მძიმე გვალვა. მათი პროგნოზით, გვალვას იტალიის სოფლის მეურნეობის ინდუსტრიისთვის 3 მილიარდი ევროს ზარალის მიყენება ძალუძს.
"ნალექის ნაკლებებო და 40-გრადუსიანი სიცხე მოსავლის 30-40%-ს ემუქრება", - ციტირებს AP ექსპერტების სიტყვებს. მათი თქმით, გვალვა უკვე ძალიან აზარალებს ბრინჯის ველებს პოს ხეობაში, სადაც ტრადიციულად მოჰყავთ არბორიოს ბრინჯი, რომელსაც სახელგანთქმული რიზოტოს დასამზადებლად იყენებენ.
იმავდროულად, მდინარე პო - უდიდესი მდინარე იტალიაში და წყლის მთავარი წყარო ქვეყნის ჩრდილოეთით - წვიმის გარეშე ნაკლებად წყალუხვი გახდა.
"როგორც წესი, მდინარე პოში წყლის ნაკადი დაახლოებით 160 000 ლიტრია წამში და ახლა ეს მაჩვენებელი 30 000-დან 60 000 ლიტრამდე წამში მერყეობს“, - იუწყება AP ექსპერტებზე დაყრდნობით.
გვალვის შედეგები მკვეთრად იგრძნობა მილანში, იტალიის უმდიდრეს ქალაქში. ქალაქის მერმა შადრევნების გამორთვის განკარგულება გამოსცა.